Rokstu sagataveja: portals lakuga.lv

“Nezināmā Rēzekne” ir aktiva dūmubīdru grupa, kurūs vydā ir piļsātplānuošonys, arhitekturys, kulturviesturis i etnografejis pieteišonys entuziasti. Jī eistynoj vysaidys iniciativys Rēzeknē, kas uzloboj vītejū vidi i izgleitoj sabīdreibu. 2025. gods pasuokumu programu aktivisti jau aizsuoce februarī, tok pavasarī gaidomys vairuokys ar Latgolu i latgaliskū saisteitys lekcejis.

“Nezināmā Rēzekne” tyka izveiduota kai aktivu riezeknīšu kūpīna, kas nu 2018. gods organizej vysaidys aktivitatis, par pīmāru, 2020. godā izdeve izgleitojūšu izdavumu “Nezināmā Rēzekne. Ceļvedis ziņkārīgajiem”, kai ari gleznuotūs posta karteišu sereju “Rēzeknes novada dievnami”. Nu 2022. gods septembra kūpīna regulari organizej sabīdreibu īsaistūšus pasuokumus, kas veicynoj socialū aktivitati i lokalpatriotismu: bezmoksys izgleitojūšus puorguojīņus i ekspedicejis piļsātā, lekcejis, kas popularizej zynuotni i regionalū viesturi, kai ari darbneicys, kas veicynoj piļsātvidis uzlobuošonu. Taipat kasdīnā aktivisti sovā Facebook lopā publicej vysaidus īrokstus ar viesturiskom fotografejom i muokslys dorbim, kurūs radzama Rēzekne.

Februarī “Nezināmā Rēzekne” aizvadeja divejus pasuokumus: Juoņa Apīņa lekceju par dzymtu pietnīceibu i Andra Uškāna lekceju par posta viesturi i atteisteibu, kas aptvēre laiku nu senejuokūs līceibu leidz myusu dīnom. Marts īsasuoce ar Voldemāra Ivdra stuostu par Rēzeknis ebrejim, kurū var nūsaklauseit ITE. Taipat itymā mienesī aktivisti eipaši pīsavierš putynu temai – taisejuši putynu būrus, apsekuojusi i teirejuši tūs, kai ari pietejuši, kurī pytyni ir lygzduojuši pavasarī. Kai teireit būrus, var izzynuot ITE.

Aktivisti jau saplānuojuši nūtikšonys martā, aprelī i majā. Byus ari treis ar latgaliskū saisteitys nūtikšonys. 15. martā 13.00 stuņdēs nūtiks Igora Pliča lekceja “Latgales fotogrāfi“, kurā vaira varēs izzynuot par fotografejis i fotografu viesturi Latgolā. 29. marta lekcejā, kas suoksīs 13.00 stuņdēs, Andra Zubko-Melne pastuosteis par administrativi teritorialajom reformom Latgolā. Sovpus 5. aprelī 13.00 stuņdēs Angelika Juško-Štekele vadeis lekceju “Latgaliešu folklorā pasmeltas receptes laimes atpazīšanai, piesaistīšanai un noturēšanai”. Ituos lekcejis nūtiks Rēzeknis muokslys nomā. Par cytim pasuokumim i tūs nūtikšonys vītom var izzynuot “Nezināmās Rēzeknes” Facebook lopā ITE.

“Nezināmā Rēzekne” aicynoj tolkā breivpruoteigūs, kas grybātu dareit lelys lītys kūpā ar jim. Ka tevi uzrunoj jūs vierteibys i gribi struoduot komandā, aktivistim var pīsavīnuot, rokstūt iz info@rositten.lv. Ar bīdreibu i tuos statutim var īpasazeit ITE.