Rokstu sagataveja: portals lakuga.lv

Atīmūt pavasaram, grupa “Borowa Mc” publicējuse jaunu dzīsmi “Mīļoj”, kū klauseituojim pyrmū reizi beja vareiba dzierdēt Latgalīšu kulturys goda bolvys “Boņuks 2024” ceremonejā 1. martā Rēzeknē. Reizē ar jaunū, Latgolys viestnīceibā “Gors” fiļmātū dzīsmis videoklipu, grupa rudinī, 18. oktobrī, aicynoj iz koncertu Reigā – koncertzalē “Palladium”.

Kai viestej grupys “Borowa Mc” solists Aigars Runčis, dzīsme “Mīļoj” ir stuosts ap attīceibom, kas iztur laika puorbaudi, palīkūt viņ stypruokom. Grupys dalinīki pīzeist, ka itei dzīsme pi jūs atguojuse vīglai, kam, kod zyni, kū i deļkuo gribi pasaceit, vuordi i melodeja rūnūtīs dabiski.

Jaunuos dzīsmis tapšonā “Borowa Mc” turpynuojuse sadarbeibu ar producentu Jāni Šmēdiņu (Fakts). Dzīsmis “Mīļoj” muzykys autore ir Guntra Kuzmina-Jukna, bet tekstu pīrakstejs Aigars Runčis. Leidza ar dzīsmis publiciešonu pyrmizruodi pīdzeivoj Latgolys viestnīceibā “Gors” fiļmātais videoklips, kuru taisejs Ivars Utināns. Kai stuosta grupa, videoklips asūt eipašs ar naīrostuoku ideju – grupa uzastuoj, bet nadzīž skateituojim. Vysa viereiba asūt tim, kurī vysod palīk aiz skotivis. “Mums tei beja saviļņojūša šaļts – veļteit dzīsmi tim, kas ir ar mums vysūs koncertūs, koč i mes jūs īrosts naredzim,” soka Aigars Runčis. Klipā kūpā ar grupys “Borowa Mc” dalinīkim – Aigaru Runči, Ingaru Gusānu i Guntru Kuzminu-Juknu – fiļmiejuos ari Sintija i Tuoms Sandori i Silvija i Juoņs Mežinski.

Reizē ar jaunū dzīsmi grupu pīsoka ari gataveišonūs rudiņ, 18. oktobrī, paradzātajam koncertam Reigā, koncertzalē “Palladium”. Beletus iz koncertu suoks tierguot nu 20. marta 10 stuņžu reitā “Biļešu Paradīze” beletu sistemā. Kai soka Aigars Runčis, tod itūgod paīt 20 godu nu grupys debejis albuma “Trepis iz nakurīni”, kurs sovulaik dabuojs “Zalta diska” statusu. Deļtuo grupa Reigys koncertā sūlej spēlēt kai par klasiku palykušuos “Borowa Mc” dzīsmis, tai i pādejūs godūs radeitūs skaņdorbus.

Atguodynuosim, ka pārnejā godā grupa “Borowa Mc” ar lelu koncertu Rēzeknē, Latgolys viestnīceibā “Gors”, nūsvietieja sovu 20 godu pastuoviešonys jubileju. Itymā laikā izguojuši treis grupys studejis albumi (“Trepis iz nakurīni” (2005), “Plastilina pasaule” (2007) i “Ui, lobs” (2008)), dabuotys treis Latvejis Muzykys īrokstu goda bolvys, kai ari radeitys dzīsmis, kas palykušys par daļu nu Latvejis myusu dīnu muzykys klasikys, par pīmāru, “Vysskaistuokajai meitinei”, “Maņ navajag” i “Iededzies par Latviju”.