Rokstu sagataveja: portals lakuga.lv

Grupa aba folktronikys duets “Sun Horse” izdavuši dzīsmi “Ūguos guoju”, kas baļsteita moz zynomā dzīsmis “Treis muosenis ūguos guoja” melodejis versejā, kū 1973. godā Borkovā teikuse Magdalena Trūps, informej grupys puorstuovi.

“Latvejis dzeivuotuoji vēļ niu mežā īt laseitu sieņu, ūgu i rīkstu. Grupys “Sun Horse” dzīsme “Ūguos guoju” stuosta par gadīni, kod mežā atrūn kū vaira par sienem. Voi tev ir gadejīs mežā nūsablūdeit? Voi ir ruodejīs kaids gors zam lozdu kryuma, kaida radnīceiga dvēsele?” vaicoj grupa.

Īdviesme dzīsmis animacejai rosta šyunu automata matematiskajā modelī, kas zynoms kai “Konveja dzeivis spēle” (angliski – Conway’s Game of Life). Tys simulej dzeivi šyunu leiminī ar matematiskim lykumim i izaver kai deja. Animacejā puorsakluoj vairuoki stilizāti ituos dejis sluoni ar dažaidu sarežgeiteibys pakuopi, atdarynojūt mežā sovā vydā saisteitu dzeiveibys formu mejīdarbeibu i mikro, i makro mārūgā.

Dzīsmis pamatā izmontuota melodeja nu Borkovys, kū teikuse Magdalena Trūps 1973. godā, kai ari dainys nu Ontona Bacuļa vuokuma Rēzeknē 1927. godā i Pītera Stroda vuokuma Mērdzinē.

Grupa “Sun Horse” ir folktronikys duets komponista i perkusionista Džeikina E. Pūsona i dzīduotuojis Eli Elleris sastuovā, kas izpylda latvīšu tradicionalajuos dzīsmēs īdvasmuotu muzyku tautys i elektroniskūs instrumentu pavadejumā. Grupa eipašu viereibu veļtej folklorā mynātajai jāgai i tuos atspīgeļuojumam futurystyskā skaniejumā, rezultatā izceļūt senejuos melodejis i vuordus, kurūs tembralai pastyprynoj elektroniskī instrumenti. Da šam “Sun Horse” ir pīsadalejuši eksperimentaluos muokslys festivalā “Optižūns” 2022. godā, kai ari muzykys i muokslys festivalā “Valpurģi” 2024. godā.

Dzīsmis “Ūguos guoju” tapšonā pīsadaleja Eli Ellere (bolss, sviļpaunīks, izmontuotuo folklorys materiala izpiete) i Džeikins Pūsons (perkusejis, analogais sintezators, produciešona, animaceja). Dzīsmi masterēja Lomix Hodila.