Rokstu sagataveja: portals lakuga.lv

Ituo gods aprelī humora projekts “Četri bruoli” brauc turē pa Latveju. Četri bruoli Kozlovski – Kozmens (Mārteņš), Oskars, Jurs i Juoņs – gasteis sešuos Latvejis piļsātuos. Pyrmū reizi šovs tiks izvasts uorpus Reigys, kab pīpiļdeitu pavasari ar smīklim i pozitivom emocejom. Vīns nu šovu 12. aprelī 19.00 stuņdēs nūtiks ari Rēzeknē, Latgolys viestnīceibā “Gors”, tuo eipašais gosts byus Kristaps Rasims.

Šovi nūtiks taiduos vītuos kai Ādaži, Sigulda, Valmīra, Rēzekne, Līpuoja i Carnikova. Beletus var nūpierkt ITE. Bruoli nasamainūt (tik palīkūt vacuoki), bet teik uzlobuots šova formats. Kotrā šovā turē bruoli atrass jaunus veidus, kai izklaidēt skateituojus, iznest cauri i puorspēt cytam cytu aizdavumūs, kab gols golā nūsaceitu, kurs ir lobuokais. Taipat kotrā turis pūsmā byus kaids eipašais gosts. Rēzeknis šovā tys byus Kristaps Rasims, ar kurū kūpā tiks puorbaudeits na tik skateituoju humors, tok ari poša Kristapa improvizacejis muoksla.

“Bruoli na cīši labi runoj latgaliski, bet es ar Kristapu raudzeišu runuot latgaliski. Kristapu mes izalasejom partū, ka ar jū kūpā jau pabejom iz skotivis “Boņukā”, asam jau īsasiļdejuši. Jis ir tik mīleigs i lobs cylvāks, ka mes jū navariejom napajimt. Taipat jam nav problemu pasasmīt pošam par sevi, i jis naapsavainoj, ka kaids pasasmej par jū. Piec vuorda kārmanā jam ari nav juolein. Mes ar Kristapu paspēlēsim improvizacejis,” par latgaliskū šovā i Kristapa izvēli komentej Kozmens aba Mārteņš Kozlovskis.

“Šovs saucās “No Ādažiem līdz Carnikavai”, par tū, ka tys suoksīs Ādažūs i beigsīs Carnikovā. Tys byus puiciskys, tī nabyus nikas glauns i grandiozs. Vyss byus šmuki, bet tai kai mes esam puiši, tei atmosfēra byus vīgla i humora pylna. Vīna nu sadaļu byus rebusi. Nūsaucem tūs par Jura rebusim, kam jis tūs izdūmuoja. Cyta storpā, latgalīšim principā jau beja vareiba tūs paminēt “Boņuka 2023” ceremonejā. Vēļ byus taida sadaļa, kas saucās “Napraseituo reklama”, kurā vīns nu cylvāku varēs sajimt bolvu. Mes cylvākim ruodeisim reklamu, kas vīnā šaļtī tiks apturāta i jim byus juoatmiņ, kas tei par reklamu. Ka nivīns naatminēs, tod mes piec paskota jau suokumā izalaseisim kaidu, kurs tū bolvu byutu cīneigs sajimt. Taipat mums byus stendapi i muzykaluos sadalis,” tai par šova saturu Kozmens.

Muzykalū pavadejumu šovā nūdrūsynuos eipaši šovam radeita grupa “Pusbrāļi”, kuruos sastuovā ir Jānis Niedra, Artūrs Strautmanis i Toms Valmiers. Puortraukumā dalinīkus prīcynuos na tik sarunys i atsvaidzynūši dzierīni, bet ari gūrnu kusteibu raisūšais deju greidys pavieļnīks DJ Kress.

Vysu jaunuokū i svareiguokū informaceju par šovu var izzynuot bruoļu Instagram profilā, kai ari sātyslopā cetribrali.lv.