Rokstu sagataveja: portals lakuga.lv

Itamā nedeļā socialajūs teiklūs pasaruodeja viests, kas aicynoj aiz laika rezervēt datumu – 19. julī Augšdaugovys nūvoda Leiksnā atsagrīzs latgalīšu muzykys festivals “Muzykys skrytuļs”. Kai portalam lakuga.lv pastuosteja vīna nu festivala reikuotuoju, bīdreibys “Mūsu Līksnai” puorstuove Gunta Mežule, festivals byus divejis dīnys – pyrmuo tradicionali nūtiks Leiksnys muižys parkā, bet ūtrajā dīnā Leiksnys Vysusvātuos Jezus Sirds Romys katuoļu bazneicā gaidoms goreiguos muzykys koncerts.

Pyrmū reizi festivals “Muzykys skrytuļs” Augšdaugovys nūvoda Leiksnā nūtyka 2005. gods vosorā, bet īprīškejais festivals aizvadeits pandemejis laikā – 2020. gods vosorā – i beja digitalā formatā. Kai stuosta Gunta Mežule, ituos nedelis viests par datuma rezerviešonu nūzeimoj, ka Leiksnā atsagrīzs festivals seņ gaideitais festivals “Muzykys skrytuļs”. “Tai kai īprīškejais festivals beja digitals, paguojs jau lobs laiks, beja jau zynoma nostalgeja. Pādejūs godūs vysā bīži sajēmem vaicuojumus kai nu festivala apmaklātuoju, kod byus festivals, tai i muziki izsaceja gribiešonu, ka byutu juosasateik festivalā – topušys jaunys dzīsmis, voi grupom, kas beja kaidu laiku apklusušys, vajadzeigs stimuls, mierkis, iz kū īt. Festivals ir tei vīta i laiks, kod var realizētīs! Bet taišni itūgad deļtuo, ka beja atbolsts nu Augšdaugovys nūvoda i mums ir jaudeiga bīdreibys “Mūsu Līksnai” komanda. Festivals byus draudzeigs, saimem pīmāruots i vysaiži cytaiži lobs – svieteisim latgalīšu volūdu, gūdynuosim latgalīšu muzyku!” par festivala atsagrīsšona soka Gunta.

Verūtīs iz festivala “Muzykys skrytuļs” viesturi i tū, kas pasamejs ari muzykā latgaliski, Gunta pīzeist, ka niu vyss ir cytaižuok. “Tūlaik, 2005. godā, jaunuo latgalīšu muzyka vēļ tik dzyma – paraleli festivalam beja Latgolys Radeja, roduos jaunys grupys. Niu, piec 20 godu, tuos grupys jau ir popularys, ar sovu bagažu, rūnās ari jaunys, par kū prīca. Atškireigais, ka saleidzynoj itūs laikūs, ir ari tys, ka suokumā aicynuojom grupys latgaliski nūspēlēt vysmoz kaidys treis dzīsmis, bet pādejuos festivala nūtikšonys reizēs grupys muzicej tikai latgaliski. Tū skaitom par cīši lobu zeimi! Ir saturs i kvalitate. Muzyki vaira na tik aranžej tautysdzīsmis i folklorys materialu, bet tūp jaunys dzīsmis i teksti, teik calti gaismā latgalīšu dzejnīki,” puormainis latgalīšu muzykā 20 godu laikā īzeimej Gunta.

Kai stuosta festivala reikuotuoja, namaineiga vysu laiku palikuse festivala devize – Valentina Lukaševiča dzejūļa aile “Kruot var na tikai naudu”, saglobojūt festivala nakomercialū dobu, ari itamā vosorā “Muzykys skrytuļs” kotram grybātuojam byus bez moksys. Organizatori izsludynuojuši festivala datumus – pyrmuo dīna, 19. juļs, byus ar latgalīšu grupu koncertu i cytom aktivitatem vysai saimei Leiksnys muižys parkā, bet ūtrajā dīnā, 20. julī, gaidoms goreiguos muzykys koncerts Leiksnys Vysusvātuos Jezus Sirds Romys katuoļu bazneicā. Paraleli muzykys nūtikšonom byus ari “Muokslys skrytuļs” ar muokslinīku aktivitatem.

Atsokūt iz vaicuojumu, kū festivals nūzeimoj pošim leiksnīšim, Gunta Mežule pīzeist, ka napasabeis saceit, ka jim tys ir svareiguokais, popularuokais i sirdei tyvuokais pasuokums, ari pats leluokais, kam tei nav viņ Leiksnys, Augšdaugovys voi pat tik Latgolys mārūga nūtikšona – ari itūgod plānuots turpynuot festivala tīšraidis tradiceju, pīduovojūt vareibu festivalam sekuot leidza sevkurā vītā pasaulī. “Skrytuļs ir taids kūpīnys pasuokums, kai saimē – sajiuta, ka sasateik puora tyukstūšu saimis lūcekļu, rodu. Poši muziki ari smejās, ka sasatikt festivalā ir kai sasatikt kaidūs saimis gūdūs,” soka Gunta.

Festivala programa vēļ tūp, bet organizatori aicynoj sekuot leidza “Muzykys skrytuļa” aktivitatem socialajūs teiklūs i medejūs – pakuopeniski tikšūt sludynuoti muziki, kurūs itūgod varātu byut da 30, stuosteits par festivalā paradzātū. “Leidza ar datumu izsludynuošonu vysmoz maņ ir jau taida dzierkstūša prīcys sajiuta, gaideit kai taidus Zīmyssvātkus!” nūsasmej bīdreibys “Mūsu Līksnai” aktiviste, festivala reikuotuoja Gunta Mežule.