Rokstu sagataveja: portals lakuga.lv

Šudiņ, 28. martā, apvīneiba “Latgalīšu reps” publicējuse jaunuokū skaņdorbu – dzīsmi “Oh My God”. Reizē ar dzīsmi publicāts malnboltā stilistikā taiseits videoklips, kas fiļmāts Daugovpilī.

Grupys darbeibys interesentim i leidzjutiejim jaunū videoklipu beja vareiba redzēt jau vakar, 27. martā, eipašā videoklipa vieršonuos publiskajā straumiešonā, kurys laikā “Latgalīšu repa” dalinīki Ivo Grigalis i Didzis Kozlovs atbiļdēja ari iz skateituoju vaicuojumim, komentēja dzīsmis rasšonūs i videoklipa fiļmiešonu. Kai pīzyna grupys dalinīki, tod jaunuo dzīsme ir eipaša ar tū, ka juos bītu radejuši poši “Latgalīšu reps”, kai ari sovā ziņā “Oh My God” ir mozuok īrosta pādejuo laikā taiseitajom dzīsmem, vaira atsagrīsšona pi hiphopa sakņu, iz kū ir atsauce videoklipā – pyrmūs dzīšmu raksteišonu tīpat vyrtuvē. Taišni itamā ainā klipā fiļmējusēs i Ivo mama.

Dzīsmi “Oh My God” miksiejs i masteriejs Jānis Šmēdiņš (fakts), taipat pi dzīsmis taiseišonys pīsadalejs Nikita Turubanovs (Funky DJ Elegant). Videoklipu fiļmiejs Ritvars Bluka. Kai “Latgalīšu reps” portalam lakuga.lv pīzyna raidīroksta “Mīti” pyrmajā sarunā, pasaulī videoklipi muzykā vaira nav cik īrosta prakse, bet jī vystik vēļ pi juos rauga pīsaturēt, īsaguļdūt video kvalitatē.

Jaunais dzīsmis “Oh My God” videoklips fiļmāts Daugovpilī, i taišni tī grupai paradzāts tyvuokais koncerts – 30. majā Daugovpiļs piļsātys svātkūs.

Grupa “Latgalīšu reps” ir hiphopa duets, kurā apsavīnuojuši Ivo Grigalis i Didzis Kozlovs. Grupa tyka dybynuota 2017. godā, kab īdvasmuotu jaunū paaudzi nūviertēt i saglobuot latgalīšu volūdu. Grupa dzīd latgalīšu volūdā, apvīnojūt hiphopu ar Latgolys kulturu, humoru i tradicejom.