Intervejis autore: Amanda Anusāne

Līgu Springu kaids pazeist kai plānuotuoja “Giut breidi” autori, cyts – kai aktivu kulturys cylvāku Rēzeknē i niu kai Austrumlatvejis rodūšūs pakolpuojumu centra “Zeimuļs” direktori. Tok poši tyvuokī jū pazeist kai dzeivis baudeituoju, vysod prīceigu cylvāku i cīši lobu draugu. Maņ dūta vareiba Līgu pazeit i kai draugu, i kai kolegi, kūpā rodūt “Giut breidi”. Itamā sarunā runuosim par vysu piec kuortys.

Saruna nūteik munā vyrtuvē, Rēzeknis dzeivūklī. Gatavejās vakarenis, sūpluok Līgys dāls Gustavs, kurū es pajiemu nu basketbola treneņa, cikom Līga beja Daugovpilī iz “Re:Baltica” atvārtū redakcejis sapuļci i ceļveža par klimatam saudzejūšu dzeivis veidu latgaliski atkluošonu. Tai kai ar Līgu asam draudzinis, navaru jū intervēt oficiali. Itei interveja vaira ir kai diveju draudziņu saruna pi vyrtuvis golda, kurū reizem puortrauc buļbu kotlys, kas īt puori molom. Cikom es verūs buļbis, Līga jau suoc runuot par laimi. Mudri damīdzu pūgu, kab īraksteitu sarunu i nikuo napalaistu garum. 

Līga: Mums ir īspieja izalaseit, kur aizīsim, i mes pījamam dažaidus lāmumus, kas myus nūvad iz tū punktu, kur teikam. Tik, voi mes padūmojam, kurs ir tys suoku punkts?

Amanda: Voi tu esi laimeiga?

Līga: Es asu laimeiga kotru dīnu. Cīši bīži, kod komuniceju ar kaidu i myusu saruna suoc palikt tyva, kod ir taida sajiuta, ka varu runuot par vysaidom temom. Es īsadrūsynoju pavaicuot, voi tu esi laimeigs. Voi tu esi laimeiga?

Amanda: Nui!

Līga: Redzi, tu vari atbiļdēt, bet ir cylvāki, kas apmulst. I tod jī suoc dūmuot – kas ir laime? Nu nazynu… Vajag par tū padūmuot.

Amanda: Kas tev ir laime?

Līga: Maņ? Maņ tagad vysuleluokuo laime ir “Zeimuļs”. Tys mani ir cīši, cīši ītekmiejs. Es tī jiutūs tik laimeiga. Iz dorbu pasamūstu ar prīcu, reizem pat bez mūdynuotuoja. Dorba ir daudz, izaicynuojumu daudz, bet maņ pateik. Tī ir cīši lela adrenalina deva. Kod sev pastoti augstu lateņu i saprūti, ka tei ir juosasnādz.

Amanda: Navar blamētīs. Nav variantu. I kai tev beja īīt “Zeimulī” kai direktorei, kod eisti nasaprūti, kai lītys struodoj, bet ir juovoda komanda?

Līga: Es beju nūsabeiduse. Mums vysim koč kod ir baist. Pareizi? Ir situacejis, kod tu vīnkuorši navari paruodeit sovu baili. Vēļ pyrma oficialuos dorba dīnys, decembrī, beju aizguojuse īpasazeit ar komandu. Es nasaceitu, ka tei beja loba sajiuta. Es raudzeju sevi īlikt jūs kūrpēs i nu uorspusis vāruot, kai tys ir, kod īīt jauns cylvāks, kod jī ir struoduojuši piec sovys rutinys. Sovā īrostajā rytmā vysus itūs godus, i tod pieški nūteik nazkaida nalela zemis treice i mainuos jūs kasdīna.

Amanda: Bet jī ari beja nūsabeiduši.

Līga: Jā, tys mani mīrynuoja. Golvonais – naparuodeit, ka asu uzatraucs, īt drūsai. Es tik suoču tausteit teritoreju, suoču dūmuot, suoču īsadzilinuot. Pieteju suokūtnejū “Zeimuļa” ideju, suoču pieteit vysus jaunuotnis lykumus, lykumus izgleiteibā. Kab saprostu, kai jī da šam ir struoduojuši, kaidi ir pamati i kū vēļ var maineit.

Amanda: Bet tei tev nav pyrmuo pīredze dorbā ar jaunīšim?

Līga: Kod poša beju jaunīte, maņ pasaveice, ka varieju dorbuotīs Ūzulmuižys jaunīšu centrā, kur vadeituoja beja Kristīne Rimša. Zyni, ir tī stopātuoji? Dūmoju, ka tamā šaļtī nūstopieju Kristīni, i jei mani pajēme sovā mašynā. Jei beja tei, kas mani syuteja iz pyrmajom apvuiceibom “Podusētā”. Es agruok beju brīsmeigi kautreiga. Nadūd Dīvs, ka kaids vaicuoja munu vuordu. Es iz reizis palyku sorkona, navarieju komunicēt. Ari niu asu introverts. Vyspiļneiguokais.

Amanda: Nazynu, maņ tys nasaleimej kūpā.

Līga: Redzi, maņ ir vīgli runuot ar tevi, sovā kompanejā. Bet, ka ir daudz cylvāku, es lobuok siežu, kluseju, klausūs. Es nazynu. Dūmoju, ka tik labi reizem byut vīnam klusumā. Maņ tys pateik.

Amanda: Maņ ari pateik vīnatne, bet tei nav vīntuleiba, partū ka tuos ir divejis cīši atškireigys lītys.

Līga: Tamuos apvuiceibuos saprotu – ka es koč kū grybu dzeivē, maņ ir juoizalauž nu sovys komforta zonys. I suoču jū lauzt. Es suoču sevi nanormali lauzt. Suoču izkuopt nu sovys komforta zonys, īlīkūt sevi situacejuos, kuruos es nimoz nagribieju byut. Kur maņ ir cīši naārtai. Tys beja brīsmeigi, bet tys beja vīneigais veids, kai es varieju vuiceitīs. Tai es varieju puorvarēt bailis, tai es varieju palikt drūsmeiguoka. Tai es varieju īsavuiceit runuot ar cytim cylvākim, lauzt kaidus stereotipus.

Amanda: Voi da šam tu jom esi tykuse puori?

Līga: Bailem?

Amanda: Jā, varbyut na puorvariejuse, bet esi saprotuse, ka beistīs, bet vīnolga dori.

Līga: Jā. Kod maņ ir cīši, cīši baist, saprūtu, ka vyss ir puorejūšs. Dzeivē vyss ir puorejūšs. Vyss mainuos, vyss atīt i aizīt. Kū mes varim dareit? Voi mes varim tū ītekmēt? Mes navarim. Kū mes varim dareit? Mes varim īelpuot, izelpuot i īt. Vyss. Tai tys nūteik – lānai i iz prīšku. Es ari raugu tū vysu laiku vuiceit Gustavam. Es jū programeju jau nu bierneibys. (Sauc Gustavu.) Gustav, kurs ir šmuks puiss?

Gustavs: Es.

Līga: Kurs ir laimeigs?

Gustavs: Es.

Līga: Kurs ir veiksminīks?

Gustavs: Es.

Līga: Kam dzeivē vyss izadūs?

Gustavs: Maņ.

Līga: Kam pateik matematika?

Gustavs: Ni maņ. (Smejamēs.)

Līga: Tai es programeju vysys ituos lītys.

Amanda: Vajag itū programēt, partū ka mums tei beja cyta programa. (Pasasmejam.)

Līga: Es poša, kod beistūs kur īt voi runuot, reizem pasaveru spīgelī i soku – tu vari, tu esi lobs cylvāks, tu īdvasmoj, turpynoj īt i dareit! Maņ bierneibā beja volūdys problemys. Reizem pat kai pīaugušais nūraustu volūdu. Es iz tū pīveru acs, golvonais ir nūsamīrēt, koncentrētīs, i vīnkuorši runuot nu sirds.

Amanda: Kas nūtyka piec tuo jaunīšu centra?

Līga: Es vuicejūs, i mani otkon izdzyna nu sovys komforta zonys, kod Ingars Gusāns aizsyuteja vuiceitīs Erasmusā. Pādejā studeju godā Ūzulmuižys kulturys centrā pasaruodeja kulturys noma vadeituoja vakance, i es tai pīsasaceju. Tod struoduoju jaunīšu centrā, tod Rēzeknis nūvoda pošvaļdeibā par jaunīšu lītu specialistu. Maņ vysod ir bejuši jaunīši apleik. Vēļ tod, kod struodoju Rēzeknis Kulturys i turysma agenturā, vīnlaiceigi raksteju projektus bīdreibai “Esi vasals”. Tys maņ nadeve mīra. I “Zeimulī” tys maņ ari nadūd mīra, bet niu gribīs radeit inovativuokys lītys. Inovativus vuiceibu leidzekļus voi izgleitojūšys spēlis. Koč kū, kas paleidzēs myusu školuotuojim kasdīnā vuiceit kaidu aktivitati voi atvīgluot jūs vuiceibu procesu. Bet, lai tū vysu izdareitu, vajag styprus cylvākus. Vyspuor es struodoju jau nu 12 godu vacuma. Moza revieju duorzus, kai daudzi bierneibā. Tys maņ ir īvuicejs dorba tykumu. Nazynu, agruok maņ ruodejuos, ka bez gryuta dorba rezultata nav, bet tagad nasagrib tai dūmuot. Myusu dīnuos, struodojūt gudri, var sasnēgt ari lobus rezultatus.

Amanda: Kurā šaļtī pasaruodeja “Giut breidi”?

Līga: Kod itys mozais pīsasaceja. (Ruoda iz Gustavu.) Tod muni celi sasatyka ar Lianu Merņaku. Jei pīkryta munai trokajai idejai. I niu es saprūtu, parkū. Partū ka jei ir tikpat troka kai es. Tod tu (pamuoj ar golvu iz mani) myus atrodi, partū ka esi tikpat troka kai mes. Navari mīreiga sēdēt. Es dūmoju, ka tī trokī cylvāki kai mes, kurim vysod ir par moz vysa kuo, na taidā nūzeimē, ka naudys napīteik, bet kuri naiznīkoj dzeivis dūtuos īspiejis. Jī ari maina pasauli. Planuotuojs jau kaidu laiku ir nūlykts molā, bet vajag tū plānuotuoju. Maņ vēļ pruotā ir divejis jaunys spēlis. Vīna jau divejus godus dzeivoj munā golvā. Es jau runuoju ar Skaidreiti Svikšu. Paļdis Dīvam, ka īprīškejais dorbs mani ir saveds kūpā ar tik daudzim foršim cylvākim, ari Skaidreiti.

Amanda: Vyspuor, voi tu leidz tam beju kū izdavuse? Voi zynuoji, kai tys process nūteik?

Līga: Nā, es nikuo nazynuoju. Kai soka Liāna, vajag dzeivuot piec principa: “Fake it till you make it” (Izalīc, cikom saīs – A. A.). Golvonais – nasabeit pīlaist klaidys i atzeit, ka ir lītys, kurys mes nazynim i navarim zynuot. Ir juogrib vuiceitīs. Maņ ari pateik byut kūpā ar gudrim cylvākim i vuiceitīs nu jūs.

Amanda: Voi varim gaideit plānuotuoju ari cytu godu?

Līga: Jā, bet es dūmoju, ka tys niu byus latvīšu volūdā. Itys gods beja gryutuoks i švakuoks nakai pārnejais. Dūmoju, ka es ītu ar 100 % atdevi, tikai pīsavieršūt tam, tys izsautu, bet niu es grybu, lai “Zeimuļs” izsaun. Lai tys izsaun Latvejis leiminī, lai tei byutu vīta, nu kurys vuiceitīs, jimt paraugu i lobys praksis pīmāru, īsadvasmuot.

Amanda: Kurs centrys voi cylvāks tevi īdvasmuoja tai atteisteit “Zeimuli”?

Līga: Vyspuor tys beja augustā voi septembrī, kod ar draudzinem guojom garum “Zeimuļam”, es beju sacejuse, ka tei maņ byus loba vīta, kur struoduot, veiduot pasuokumus i raksteit projektus. Itei vīta puorkluoj vysus lauceņus, kurūs es da šam beju dorbuojusēs, bet dažaiduos vītuos, ite tys vyss ir vīnā vītā.

Amanda: Vyspuor maņ da šam ir bejuse sajiuta, ka “Zeimulī” navar īsavērt īškā. Veritēs nu uorspusis iz šmukū sātu, bet nasaverit īškā.

Līga: Daudzim ir taida sajiuta, daudzi nikuo nazynuoja i naizruodeja interesi par “Zeimuļa” pīduovuotajom īspiejom.

Amanda: Tu vēļ daudz sportoj. Spielej mamanetu i ej iz svoru zāli.

Līga: Jā. Maņ pateik. “Letijas” ir Latvejis čempioni. Labi, mes itūgod vēļ naasam, bet byusim cytu godu. (Smejās.) Itūgod mums ir ūtruo vīta. Es ari cyloju svorus. Es trenejūs pīcys reizis nedeļā.

Amanda: Voi sīvītem pīsanuok cyluot svorus?

Līga: Mes dzeivojam taidā laikā, kod varim dareit vysu, kū gribim. Absoluti vysu.

Amanda: I taidā vaļstī.

Līga: Mes poši sev nūsokom daudzi rūbežu, bet mums ir tīseibys puorkuopt tūs rūbežus. Īsaklauseit sevī.

Amanda: Es pat nazynuoju, ka taids mamanets pastuov, kai tu par tū izzynuoji?

Līga: Es tūlaik struoduoju agenturā, muna dzeive beja garlaiceiga i nainteresanta. Piec dorba es absoluti nikuo nadareju. Saprotu, ka muns emocionalais stuovūklis suoc pasaslyktynuot. Es vyspuor asu dīzgon pozitiva, bet suoku švaki justīs. Tod īraudzeju, ka Veremūs ir komanda, aizraksteju treneram, i jis atļuove maņ atbraukt i paraudzeit, voi maņ patiks. Partū ka piec vysa, kū dzierdieju, maņ tys ruodejuos smīkleigs sporta veids.

Amanda: Jā, maņ ari.

Līga: Jā, daudzim, bet jī dūmoj napareizi. Ari tim veirīšim, kas tai dūmoj, vajadzātu atbraukt iz treneņu i saprast, ka tī nav nikuo smīkleiga. Vīnā breidī saprotu, ka nagrybu palikt tamā komandā. Voi nu atstuoju tū komandu, voi mekleju koč kū cytu. Tai es aizguoju i suoču doncuot tautys dejis, bet izaveiduoja cyta komanda, i maņ beja kai mamanets, tai tautys dejis.

Amanda: Vyspuor maņ ruodīs, ka tev ir vaira nkai 24 stuņdis dīnā, partū ka esi vysur. Tev izadūd pasportuot, struoduot, satikt draugus i pavadeit laiku ar Gustavu. Kai?

Līga: Pasaulī ir daudz īspieju, i es nagrybu nikuo palaist garum. Maņ pateik radeit svātkus, sapuļcēt sīvītis. Ir daudz vīntuļu cylvāku voi taidu, kam nav draugu. Es kotru dīnu rokstu dīnysgruomotu i vysod pasasoku, ka munā dzeivē ir bejs daudz cylvāku, kas pamozom ir pagaisuši i ir palykuši tī, kurūs es grybu satikt. Aicynuot iz randeņu, iz koncertu, īt iz vakareņom, taiseit pikniku, padzert kopeju. Tei ir fantastiska sajiuta, ka naesi vīns.

Amanda: Tev pateik radeit svātkus, partū “Giut breidi” telpuos taisi meistarklasis i darbneicys?

Līga: Naticieju, ka varu kūpā sapuļcēt tik daudz cylvāku. Liāna maņ īdeve zalta pendeli i ticeibu, ka tū varu izdareit. Pyrmajā meistarklasē beja baile, bet, kod tys nūteik, ir lela gondarejuma sajiuta. Seviški, ka piec tam sajamu zinis, ka es īdvasmoju cylvākus. Maņ ir gryuts nūticēt, koč i vysu laiku rokstu sovā dīnysgruomotā, ka varu īdvasmuot, radeit foršys lītys. Kod kaids tai soka, maņ ir gryuts tū pījimt.

Amanda: Es zynu, ka tu kaidu laiku nalītoj alkoholu. Parkū?

Līga: Maņ beja pagrīzīņa punkts, kod jutu, ka koč kas dzeivē ir juomaina, ka nazkas nav kuorteibā. Tys beja ari Jaunais gods, kod daudzi apsajam, bet 1. janvarī es izdzieru šampanīša gluozi. Dūmuoju, kai tys ir īspiejams? Cik cylvāku iz pasauļa sūlej koč kū izdareit, bet nadora? 2. janvarī es pasaceju nā. Jau vaira nakai godu nalītoju i nagrybu. Es asu īsavuicejuse svinēt svātkus bez alkohola. Kod es svynu i aicynoju cylvākus, soku, ka alkohola nabyus.

Amanda: Kai cylvāki iz tū reagēja?

Līga: Dažaidi. Asu pamanejuse, ka tei niu ir mūdis līta. Es poša jiutūs lobuok, zynu, ka balleitēs varu atsapyust i doncuot bez alkohola. Maņ pateik, ka varu kontrolēt sovys dūmys i reiceibu, ka ūtrā reitā sev nav nikas juopuormat i juonūžāloj. Es daudz dūmoju par uzturu, grybu ari tū sakuortuot. Maņ ir taids dzeivis veids, ka gryuts par tū pīdūmuot, bet es grybu justīs labi. Kūpumā maņ pateik muna dzeive. Maņ pateik struoduot, dzeivuot, elpuot, mīļuot. Es vysim soku, ka dzeive ir juosviņ!

Amanda: Skaisti, svinēsim!

---