Rokstu sagataveja: portals lakuga.lv

Latgolys pūdnīku dīnys ir stabila tradiceja jau daudzu godu garumā, kasgadeji Pūdnīku dīnu laikā nūteik meistaru cepļu kūršonys i izjimšonys, kuruos var apmeklēt sevkurs interesents, taipoš teik atkluotys izstuodis i organizātys eipašys meistarklasis. Itūgod eipaša viereiba tiks dagrīzta keramikys nūzaris īvarojamajom personeibom – itūgod muokslys zynuotnīkam Juoņam Pujātam tyktu svieteita 100 godu jubileja, sovpus keramiks Jurs Krompāns svieteis 75 godu jubileju, viestej publiski daīmamuo informaceja.

Kai īrosts, Latgolys pūdnīku dīnuos ir gona daudz publisku nūtikšonu, kuruos var apmeklēt sevkurs interesents. Vysa apreļa garumā gaidomys vysaiduokys aktivitatis, tok centralūs nūtikšonu vydā byus 25. aprelī gaidomuo zynuotnyskuo konference “Mālā ierakstītais mantojums. Jānim Pujātam – 100” Latgolys Kulturviesturis muzejā, Rēzeknē, i 26. aprelī – keramikys cepļa kūršona i izjimšona Juoņa i Māra Vogulu darbneicā “Voguly” Rēzeknis nūvoda Leņdžu pogosta Cepleišūs, taipoš ari kasgadejuos izstuodis atkluošona Rēzeknis nūvoda Lūznovys muižys “Kulturys škiunī”.

Latgolys Kulturviesturis muzeja zynuotnyskajā konferencē eipaša viereiba tiks veļteita Latgolys pūdnīceibys tāvam i muokslys zynuotnīkam Juoņam Pujātam. Konferencis laikā tiks turpynuota pārņ īvīstuo tradiceja – keramiku stuosti par sovu pīredzi muola kai materiala īpazeišonā. Itūreiz byus vareiba dzierdēt Raivo Andersona pīredzis stuostu, kurā tyvuok varēs īpazeit Preiļu nūvoda Polikarpa Čerņavska keramikys sātys darbeibu, kur meistars R. Andersons izmontoj poša roktūs vītejūs muolus. Konferencis laikā paradzāta dokumentaluos kinys “Latgales zelta pods” pyrmizruode Latgolā i sasatikšona ar tuos leidzautoru Aigaru Lielbārdi. Pylnu konferencis programu var apsavērt ITE.

Latgolys pūdnīku dīnu 2025 programa

Nu 6. februara da 1. maja
Daugovpiļs Tautys lītiškuos muokslys studeju “Latgale” i “Klūga” dubultjubilejis izstuode “45 un 45!”.
Daugovpiļs Nūvodpietnīceibys i muokslys muzejs, Reigys īla 8, Daugovpiļs.

Nu 2. apreļa da 4. maja
Vacmeistara Jura Krompāna jubilejis keramikys izstuode “Zemes krāsu varavīksne” Latgolys Kulturviesturis muzejā, Rēzeknē.
Atbreivuošonys aleja 102, Rēzekne.

21. aprelī 11 stuņdēs
Meistardarbneica Rēzeknis nūvoda Dubuļu tautys nomā “No māla līdz skaņai” kūpā ar Eviju Vasilevsku pasuokuma “Ieklausies putnu skaņās” laikā.
Kiršu īla 9, Dubuli, Kaunatys pogosts, Rēzeknis nūvods.

Nu 22. da 25. apreļa
Attaiseitūs durovu dīnys Latgolys pūdnīku darbneicuos. Lyugums īprīkš dasaceit sovu apmekliejumu.
22. aprelī – darbneicā “Malny Wylky”.
“Dzindras”, Mīškuoni, Maltys pogosts, Rēzeknis nūvods, tel 29466372.
23. i 24. aprelī – darbneicā “Cukrasāta”.
Bekši, Ūzulainis pogosts, Rēzeknis nūvods, tel. 28328115.
23. i 24. aprelī – Kruoslovys Amatnīceibys centra keramikys darbneicā.
Piļs īla 10, Kruoslova, tel. 26869346, 26348644.
Nu 23. da 25. apreļa – TLMS “Latgale” darbneicā Daugovpiļs Muola muokslys centrā.
18. novembra īla 8, Daugovpiļs, tel. 65425302.

25. aprelī nu 9 da 16 stuņžu
Zynuotnyskuo konference “Mālā ierakstītais mantojums. Jānim Pujātam – 100”.
Atbreivuošonys aleja 102, Rēzekne.

25. aprelī nu 17 da 20 stuņžu
“Latgolys pūdnīku dīnu 2025” cepļa kūršona Juoņa i Māra Vogulu darbneicā “Voguly”.
Cepleiši, Lendžu pogosts, Rēzeknis nūvods.

26. aprelī nu 10 da 12 stuņžu
“Latgolys pūdnīku dīnu 2025” cepļa izjimšona Juoņa i Māra Vogulu darbneicā “Voguly”.
Cepleiši, Lendžu pogosts, Rēzeknis nūvods.

26. aprelī nu 12 da 13 stuņžu
Muola darbneica Lūznovys muižā ar Eviju Vasilevsku.
Piļs īla 8, Lūznova, Lūznovys pogosts, Rēzeknis nūvods.

26. aprelī nu 13 da 14 stuņžu
“Latgolys pūdnīku dīnu 2025” izstuodis atkluošona Lūznovys muižys “Kulturys škiunī”. Izstuode byus apsaverama da 25. maja.
Piļs īla 8, Lūznova, Lūznovys pogosts, Rēzeknis nūvods, tel. 28686863, muiza@luznava.lv

26. aprelī nu 14.30 da 16.30 stuņžu
Dokumentaluos kinys “Latgales zelta pods” demonstraceja i sasatikšona ar kinys leidzautoru Aigaru Lielbārdi Lūznovys muižys sorkonajā zālē.
Piļs īla 8, Lūznova, Lūznovys pogosts, Rēzeknis nūvods.

Pūdnīku dīnys kasgadeji organizej TLMS “Rēzeknes apriņķa pūdnīki”, Latgolys Kulturviesturis muzejs Rēzeknē i Rēzeknis nūvoda pošvaļdeiba sadarbeibā ar TLMS “Latgale” (Daugovpiļs), A. Paulāna TLMS (Rēzekne), Tradicionalūs zineibu turātuoju bīdreibu “Pūdnīku skūla” i Lūznovys muižu. Cyta storpā, juopīmiņ, ka Latgolys pūdnīceiba ir ari daļa nu Latvejis Kulturys kanona.