Nūsaslāguse latgalīšu kulturys ziņu portala lakuga.lv raidīroksta “Mīti” pyrmuo sezona. Pīcuos raidīroksta serejuos tyka runuots par temom ap muzyku, medejim, volūdu, teatri i latgaliskū. Vysys epizodis var nūsaklauseit ITE. Kab saprostu, kai uzlobuot taida veida saturu, portala lakuga.lv redakceja vaicoj tova redzīņa.

“Raidīroksta mierkis ir pīduovuot jaunu veidu, kai styprynuot i atteisteit izpratni i zynuošonys par Latgolys kulturtelpu, nūtikšonom tamā, muzyku, teatri, medeju vidi i cytim aktualim aspektim, veidojūt sabīdriski nūzeimeigu, izgleitojūšu, kai ari kritiskū dūmuošonu atteistūšu audio saturu portalā lakuga.lv. Raidīroksts byus interesants i tim, kas nav īroduši, cik daudz skaiteit latgaliski, i tim, kas lobpruot patierej saturu audio formatā,” tai projekta vadeituoja Amanda Anusāne.

Projekts “Raidierakstu latgaliski sērija portālā lakuga.lv” Medeju atbolsta fonda projektu konkursā dabuoja finansiejumu 11 537,54 eiro apmārā. Raidīroksta producente i projekta vadeituoja ir latgalīšu kulturys ziņu portala lakuga.lv vadeituoja Amanda Anusāne, bet epizožu redaktoris i vadeituojis ir portala redaktore Laura Melne i žurnaliste Edeite Laime. Džinglus sagataveja “Funky Town Studio”, kurūs studejā tyka īraksteitys ari treis raidīroksta epizodis, sovpus divejis epizodis īraksteitys Latvejis Radejis Latgolys studejā. “Mītu” vizualū identitati izstruoduoja Liāna Merņaka.