Rokstu sagataveja: portals lakuga.lv

Pīktdiņ, 28. martā, Reigā, muzykys i dramys telpā “OratoriO” beja akcejis “Latvejis medeju volūdys bolva” 2024” apbolvuošonys ceremoneja. Akceju reikuoja Nacionaluo elektroniskūs plašsazinis leidzekļu padūme (NEPLP) i Vaļsts volūdys centrs (VVC), bet laureatu vydā par latgalīšu volūdys lītuošonu medejūs gūdynuoti latgalīšu kulturys ziņu portals lakuga.lv i Latgolys regionaluos televizejis (LRT) žurnaliste Ausma Sprukte-Kozule.

Akcejis, kurei nūtyka jau ūtrū reizi, mierkis ir izvērtēt i apbolvuot elektroniskūs plašsazinis leidzekļu raidejumu vadeituojus i veiduotuojus, kurī lītoj pareizu i boguotu latvīšu volūdu, ka ari periodiskuos presis izdavumus i škārsteikla ziņu portalus, kurūs lītuota kvalitativa latvīšu volūda. Akceja ir vīna nu nūtikšonu, kas veicynoj medeju i jūs auditorejis aktivu īsasaisteišonu volūdys kulturvidis kūpšonā.

“Latvejis medeju volūdys bolvu” reikoj Nacionalūs elektroniskūs plašsazinis leidzekļu padūme i Vaļsts volūdys centrs. Ka pyrmajā akcejis reizē 2023. godā sajimti 76 dasacejumi, tod 2024. godā skateituoji, klauseituoji, skaiteituoji, kai ari pošu medeju puorstuovi beja sagatavejuši 205 dasacejumus.

Bolvys pretendentus vērtēja volūdys i skotivis muokslys eksperti – volūdneicys Dite Liepa i Aiga Veckalne, režisors, runys i vokalais pedagogs Edgars Kramiņš –, VVC eksperti, kai ari akcejis sadarbeibys partneri nu Kulturys ministrejis, Latvīšu volūdys agenturys, Latvejis Nacionaluos bibliotekys, Latvejis Nacionaluo rakstnīceibys i muzykys muzeja, Latvejis Presis izdevieju asociacejis, Latvejis Raidorganizaceju apvīneibys, SIA “Tilde” i Latvejis Universitatis Socialūs zynuotņu fakultatis.

Itūreiz akcejā gūdynuoja 12 laureatus sešuos kategorejuos, beja deveni veicynuošonys bolvu sajiemieji, vīns simpateju bolvys sajiemiejs, kai ari par myuža īguļdejumu gūdynuota Latvejis Radejis redaktore Dzintra Matuzāle.

Sūpluok kategorejom par ziņu moderatorim, analitiskūs, pietnīcyskūs, diskuseju, interveju raidejumu vadeituojim, kulturys, izklaidis, sporta raidejumu vadeituojim, nacionalūs i regionalūs laikrokstu kategorejai, žurnalu kategorejai, škārsteikla ziņu portalu kategorejai, bārnu i jaunīšu žurnalistikys kategorejai akcejā gūdynuoti ari Latgolys regionaluos žurnalistikys puorstuovi par kūptū latgalīšu rokstu volūdys lītuošonu. Veicynuošonys bolvu sajēme latgalīšu kulturys ziņu portals lakuga.lv, bet II pakuopi žureja daškeire Latgolys regionaluos televizejis žurnalistei Ausmai Spruktei-Kozulei. Latvejis medeju volūdys bolvys ceremoneju var nūsavērt ITE.

Latgalīšu kulturys ziņu portala komandu ceremonejā puorstuovēja žurnaliste Edeite Laime. Sajemūt viesti par gūdynuošonu i prīcojūtīs par atzineibu, portala pateiceibys vuordi beja: “Portala lakuga.lv mierkis ir na tik viesteit par latgaliskajom kulturys nūtikšonom, tok ari atteisteit i kūpt latgalīšu rokstu volūdu, kas ir viesturyskys latvīšu volūdys paveids,“ bet Ausma Sprukte-Kozule saceja, ka, taisūt ziņu sižetus i raidejumus latgaliski, juos gribiešona ir motivēt sabīdreibu nūvērtēt i cīneit latvīšu volūdys daudzveideibu, byut lapnim, ka ari latgalīšu i lībīšu volūdys, venteņu i cytys izlūksnis ir daļa nu ituos dažaideibys. “I kas cīši svareigi – saglobuot, atteisteit i nūdūt ituos breineiguos vierteibys cytom paaudzem,“ soka Ausma.

Fotogalerejā: šaļtenis nu “Latvejis medeju volūdys bolvys” ceremonejis, publicitatis foto