Rokstu sagataveja: portals lakuga.lv

Itamā nedeļā Latgolā, 10. aprelī Rēzeknē i 11. aprelī Daugovpilī, byus divejis nūtikšonys, kas veļteitys volūdys temai i reizē norvegu autora, Nobela premejis laureata Juna Fosis (Jon Fosse) gruomotys “Kaids nūteikti atīs” tulkuojuma latgalīšu volūdā prezentacejai.

16. oktobrī Daugovpiļs teatrī pyrmizruodi pīdzeivuoja Fosis lugys “Kaids nūteikti atīs” īstudiejums, bet gruomotys versejā luga izguoja ituo gods suokuos. Fose roksta jaunnorvegu volūdā, kas leidzeigai kai latgalīšu volūda Latvejā, Norvegejā ir mozuok lītuotuo volūda. Tulkuojuma latgaliski autore ir Jūlija Tumanovska i, kas zeimeigi, pyrma tuo itei Fosis luga nav bejuse tulkuota latvyski, i niu jei par reizi puortulkuota taišni latgaliski.

Kai intervejā portalā lakuga.lv stuosteja tulkuotuoja Jūlija Tumanovska, itei Fosis luga ir par pošpuorlīceibys tryukumu attīceibuos. “Ka tev nav puorlīceibys par sevi i tu meklej tik uorejūs īmesļus, nu kurūs atsabreivuot, lai nabyutu tuos trauksmis, to tys struoduos tik ilgi, leidz tev otkon pasaruoda nazkaids mīra uordeituojs. Tys nastruoduos ilgtermiņā,” tai Jūlija (vysu sarunu var puorskaiteit ITE).

Lugys izdavums prezentaceju jau pīdzeivuojs Reigā, volūdu festivalā “Avots”, bet itamā nedeļā ari Latgolā byus vareiba sasatikt ar lugys latgaliskuo varianta izdūšonā īsaisteituos komandys puorstuovim, kai ari runuot par mozuok lītuotajom volūdom.

Catūrtdiņ, 10. aprelī, Rēzeknē (RTU Rēzeknis akademejā) byus sasatikšona, kurā varēs vaira izzynuot par Nobela premejis laureatu Junu Fosi i juo dailradi, jaunnorvegu volūdu, kurā roksta Fose, i latgalīšu volūdu – leidzeigū i atškireigū, mozuok lītuotajom volūdom kai skotivis volūdom. Taipat gaidoma poša lugys izdavuma i digitaluos izstuodis “Linguapolis” prezentaceja. Nūtikšonā pīsadaleis volūdnīks Snorre Karkonens-Svensons, tulkuotuoja Jūlija Tumanovska, literaturzynuotneica Ilga Šuplinska i literate, teatra pietneica i ari portala lakuga.lv redaktore Laura Melne.

Bet pīktdiņ, 11. aprelī, gruomotys prezentaceja gaidoma Latgolys Centralajā bibliotekā Daugovpilī. Tī kluotyn byus volūdnīks Snorre Karkonens-Svensons, teatra pietneica Kitija Balcare, volūdneica Sanita Martena i tulkuotuoja Jūlija Tumanovska. Taišni piec prezentacejis Daugovpiļs teatrī ir vareiba lugys “Kaids nūteikti atīs“ īstudiejumu ari nūsavērt.

Gruomotys prezentacejis Latgolā organizej “Volūdu sāta”, atbolsta Zīmeļvaļstu Ministru padūmis birojs Latvejā. Prezentacejis nūtikšonuos īīšona ir bezmoksys, bet pādejūs beletus iz teatra izruodi vēļ var īspēt nūpierkt ITE.