Rokstu sagataveja: portals lakuga.lv

Jau 17. reizi aprelī vysā Latvejā nūteik kasgadejais pasuokums “Satiec sovu meistaru!”, kura laikā sevkurs interesents teik aicynuots gostūs pi meistaru, kab īpazeitu i paraudzeitu vysaidys tradicionalūs omotu prasmis. Latgolā omotus varēs vuiceitīs 26. i 27. aprelī, viestej organizatori.

Pasuokumu “Satiec savu meistaru!” kūpeigi reikoj Latvejis Nacionalais kulturys centrys (LNKC), pošvaļdeibys i omotu meistari. Itūgod tys puļcēs meistarus i “muocekļus” vaira nakai 200 vītuos. 5. i 6. aprelī meistarus jau varēja satikt Kūrzemē i Zemgalē, 12. i 13. aprelī varēs Vydzemē i Sielejā, tok 26. i 27. aprelī – Latgolā i Reigā. “”Satiec savu meistaru!” golvonais aizdavums ir popularizēt Latvejis namaterialū kulturys montuojumu, i kotru godu pasuokumā puorsalīcynojam par tū, cik tys ir plots, cik daudz nazynomu nianšu vēļ ir,” pastreipoj LNKC tautys lītiškuos muokslys eksperte Linda Rubena.

Pasuokuma nūslāguma nedeļā, 26. i 27. aprelī, daudzi vysaidu meistaru darbneicu byus Latgolā i Reigā. Latgolys nūvodu puorstuov Augšdaugovys, Bolvu, Jākubpiļs, Kruoslovys, Ludzys, Preiļu, Leivuona nūvodi, kai ari Daugovpiļs i Rēzeknis piļsātys. Vaira informacejis par ituo gods “Satiec savu meistaru!” aktivitatem i dasasaceišonu tom daīmama ITE. Taipat informaceju var meklēt sātyslopuos satiecsavumeistaru.lv i lnkc.gov.lv, tei ir daīmama ari piļsātu i pogostu kulturys centrūs. Daleibnīku skaits daudzuos nūtikšonu vītuos ir īrūbežuots, partū pi meistaru juopīsasoka sovlaiceigai. 

Latgolā ir spieceigys ausšonys, adeišonys i peišonys tradicejis, prūtams, ari keramikys, kurys vaira var īpazeit kasgadejuos Latgolys pūdnīku dīnuos. 27. aprelī Maltys viesturis muzejā nūtiks meldru pynumu meistarklase. “Ir daudzi pynumu, bet meldri ir vīns nu vīgluokūs, i es paruodeišu, kū nu tuo pynuma var iztaiseit. Meldri ir vīgli dabojams materials, Maltys upē ir cīši šmuki meldri. Vuiceisimēs taiseit rūbainū peini, paruodeišu, kai tū sašyun, kai veidojās trauks, paliktnis i vyss puorejais. Es atvesšu ari taidus dobā daīmamus materialus kai saknis, klugys, cysys. Paruodeišu, kaidus pynumus var nu itūs materialu taiseit. Ka muzejs pīkrīss, tod cytugod varēsim vuiceitīs cytu pynumu,” tai par meistarklasi soka Līga Tulinska, Reigys kulturys i tautys muokslys centra “Mazā ģilde” tautys lītiškuos muokslys studejis “Tīne” vadeituoja, kuruos vacuoki īt nu Maltys pogosta.

Pasuokums “Satiec savu meistaru!” ir turpynuojums 2009. godā aizsuoktajai Tradicionalūs prašmu školai. Tuo byuteiba – informēt plašuoku sabīdreibu par cylvāku, juo zynuošonom i prasmem, kas ir saglobuotys i nūdūtys nu paaudžu paaudzēs. Pasuokuma forma ir breiva – meistaru vadeibā nūteik meistarklasis, individualuos nūdarbeibys i atkluotuos darbneicys, paraugdemonstriejumi, lekcejis, prīšklasejumi, koncerti voi daņči ar mierki veicynuot sabīdreibys leidzdaleibu Latvejis namaterialuo kulturys montuojuma saglobuošonā.