Rokstu sagataveja: portals lakuga.lv

Daugovpiļs tymsi zylais kors, kas sevi dasaceja TV3 raidejuma “Koru kari” 4. sezonā, kūpā ar vadeituoju Arni Slobožaninu turpynoj sovu muzykalū ceļu ari piec daleibys šovā i aicynoj iz vosorys koncertturi, kas aizasuoks 23. majā Daugovpiļs kulturys pilī. Kors klauseituojim pīduovoj divejus singlus latgalīšu volūdā – energiskū Latgolys grupys “Green Novice” dzīsmi “Dūd, dīveni” i grupys “Dabasu durovys” dzīsmi “Reits”.

“Dzīsme “Reits” breineigi atbylst godalaikam, kurā mūstās doba. Itys ir laiks, kod mums ir vareiba nūstuot, īelpuot pavasari i pozitivai uzaluodēt. Itamā dzīsmē atsaspīgeļoj dobys skaistums, kas vysod ir bejs muns īdviesmis olūts. Dobā es dziļuok izjiutu muzyku, tok caur itū dzīsmi muzyka ļaun maņ izjust dobu. Asu eistyn prīceiga byut Daugovpiļs tymsi zyluo kora rynduos i turpynuot eistynuot tuo idejis – mums vyss vēļ tik prīškā,” soka dzīduotuoja Santa Savicka-Drozdova, kura skaņdorbā izpylda solo kūpā ar Arni Slobožaninu.

“Eipaši gribiejom īprīcynuot tymsi zyluo kora sirsneigūs atbaļsteituojus, kuri turpynuoja uzmundrynuot i just leidza ari piec myusu “Koru karu” pīdzeivuojuma beigu. Socialajūs teiklūs sajēmem daudzus komentarus par tū, ka klauseituoji grib turpynuot baudeit myusu dzīsmis latgalīšu volūdā, partū, dūmojūt par kora īrokstim, nūsprīdem suokt taišni ar itim skaņdorbim. Dzīsmis “Dūd, dīveni” i “Reits” izpiļdejumā ar kori īraksteitys pyrmūreiz, i mes asam cīši prīceigi, ka tuos varēs klauseitīs na tik plānuotajūs vosorys koncertūs, tok ari vysaiduos straumiešonys platformuos,” stuosta kora vadeituojs Arņs Slobožanins. Jis dasoka, ka plānuots īraksteit ari taidys dzīsmis, kas šova laikā izskanēt napaspēja, pīmāram, Latgolā dzymušuo komponista Jura Kulakova spieceigū skaņdorbu “Zaļā dziesma”.

Arņs ari atkluoj, ka Daugovpiļs tymsi zylais kors turpynoj aktivu dorbu, kab atbaļsteituojim saguoduotu jaunus muzykalus puorsteigumus. Kors aktivi struodoj pi repertuara pylnveidis i jau itūšaļt īplānuoti koncerti Akneišā, Daugovpilī, Kuorsovā, Rēzeknē i cytur. Vosorys koncertture tiks dasaceita ar koncertu Daugovpiļs kulturys pilī 23. majā 18.00 stuņdēs. Beletus iz itū koncertu var nūpierkt “Biļešu Paradīzes” kasēs i škārsteiklā.

Daugovpiļs tymsi zylū kori voda Arņs Slobožanins – muziks, grupys “Dabasu Durovys” liders, viesturnīks, TV raidejumu vadeituojs, kinu producents i Latgolys kulturys patriots. Tymsi zylajā korī apsavīnuojuši dzīduotuoji nu vysaidu Latgolys piļsātu i tyvejūs nūvodu – Daugovpiļs, Preiļu, Kruoslovys, Leivuona, Rēzeknis, Baļtinovys, Īlyukstis, Jākubpiļs, Sveņtis i cytu vītu.

Daleiba šovā “Koru kari” Daugovpiļs tymsi zylajam koram nese treis skateituoju simpateju bolvys – kotru 1000 eiro vierteibā nu šova atbaļsteituoja “Primero”. Daļu nu ituos bolvys kors īguļdeja skotivis tārpūs, bet 1000 eiro tyka zīduoti Daugovpiļs 2. specialajai pyrma školys izgleiteibys īstuodei. Zīduojuma mierkis – nūpierkt jaunus muzykys instrumentus, kab bārni varātu atteisteit sovys rodūšuos izpausmis i īpazeit muzykys pasauli.