Rokstu sagataveja: portals lakuga.lv

“Otkon kluot ir Leluo jeb Klusuo nedeļa. Itamā nedeļā eipašu viereibu gribu pīvērst Treis Svātajom dīnom i tūs liturgejai, kurū izdzeivoj Bazneica. Caturtdiņ Kunga Pādejūs Vakareņu pīmiņa, kurūs laikā Jezus īdybynuoja Vyssvātuokū Sakramentu i Prīstereibu. Pīktdiņ Kunga Cīsšonu i Nuovis pīminis dīvakolpuojums, kurū var izdzeivuot tik reizi godā i taišni itamā dīnā. Teik svieteita seneja liturgeja, kura naatstuoj vīnaldzeigu nivīnu kluotasūšū! Vysbeidzūt, sastdiņ Bazneica ar Leldīnis vigilejis dīvakolpuojumu suoc svietet Kristus Augšamceļšonuos svātkus. Itūs treis dīnu liturgeja īsasuoc catūrtdiņ ar Krysta zeimi i nūsaslādz ar svieteibu tik sastdiņ Vigilejis dīvakolpuojumā. Tys mums pasoka, cik svareigi izīt cauri itom treis dīnom kūpā ar Jezu, lai nūvārtātu juo nūpalnus myusu lobā,” tai Aivars Kursītis, Vydsmuižys Svātuo Gora Romys katuoļu bazneicys prīsters. Taišni jis ir ituos svātku nedelis īsacejumu autors.

Paleidzeigys rūkys snīgšona

Gavieņa laikā mes parosti apcerejam Kunga Jezus cīsšonys, bet navarim ari aizmierst, ka Jezus turpynoj cīst ari myusu dīnuos kūpā ar slymajim, cītiejim, myusu naspieceigajim leidzcylvākim. Jezus sovulaik saceja: “Kū jius esit darejuši vīnam nu itim Munim vysmozuokajim bruolim, tū jius esit maņ darejuši.“ Mes navarim atvīgluot cīsšonys vysim cylvākim, bet varim atvīgluot cīsšonys kaidai konkretai personai. Itamā nedeļā grybu aicynuot ar zīduojumu atbaļsteit slimneicu Ilgu Ūsāni nu Gaļānu pogosta. Zīduot var ITE.

Gataveišonuos Kristus Augšamceļšonuos svātkim

Taipoš šūnedeļ grybu pamudynuot pavāruot sovus vacvacuokus voi ari jūs izvaicuot, kai jī gatavejās Kristus Augšamceļšonuos svātkim.

Dvēselis i apleicīnis sakuortuošona

Tyvojūtīs svātkim, mēs raugom saplyust ar vysu, kas ir ap mums i myusūs, naaizmierssim par sovys dvēselis atteireišonu, kai ari par sovys bazneicys sapuciešonu, kopsātu i apleicīnis sakuortuošonu.

Lai itei nedeļa vysim nas boguoteigus Dīva Žielesteibys augļus!

Portals lakuga.lv mainejs autora lītuotū ortografeju.