Rokstu sagataveja: Daiga Laizāne

Skotivis vītā – baseins, darbneicys fitnesa zālē, bet izstuodis ekspoziceja – spa gaitiņūs. Taids beja myusu dīnu muokslys i kulturys forums “Crossroads X Krustceļi”, kas nu 24. da 27. marta itūgod nūtyka Rēzeknis spa centrā. Tū eistynuoja Latvejis Muokslys akademejis (LMA) Latgolys filiale sadarbeibā ar “British Council” puorstuovnīceibu Latvejā. Sovpus Rēzeknis piļsātys pošvaļdeiba i Latgolys viestnīceiba “Gors” paleidzēja forumam, nūdrūsynojūt telpys i tehniskū apreikuojumu.

Nu spūku kuorma par kulturvidi

Bryunuo betona ceļtne Kovšu azara krostā iz četrom dīnom nu spūku kuorma palyka par kulturvidi, kas puļcēja muokslinīkus, kuratorus, sabīdryskūs aktivistus, uzjiemiejus i rodūšūs industreju puorstuovus, kab kūpeigai dūmuotu par muokslys i kulturys lūmu regionalajā atteisteibā, sabīdreibys salīdiešonā i inovaceju veicynuošonā. Juodasoka, ka forums beja bezmoksys i atvārts vysim interesentim.

Vīns nu ituo foruma idejis autorim i organizatorim ir LMA Latgolys filialis direktoris vītnīks Raimonds Platacis, kurs foruma nūslādzūšajā dīnā pasadaleja sovuos puordūmuos par sabīdreibys īsaisti itaida formata pasuokumā. “Beja cīši lels puorsteigums redzēt tūs riezeknīšus, par kurim es navarieju īsadūmuot, ka jim taidys, ar muokslu saisteitys darbneicys interesej, tok jī guoja i dorbuojuos vysys dīnys. Beja labi redzēt, ka cylvākim ir vajadzeigs itaids saturs, ka jim vajag nūdrūsynuot itaidys vareibys i pīsadaleit itaiduos nūtikšonuos, i te eistineibā ir tei vajadzeiba. Tys nav tai, ka mums gribīs, bet riezeknīšim i nūvoda cylvākim ir vajadzeiba piec itaidu nūtikšonu,” stuosta Raimonds Platacis.

Forums nūtyka četrys dīnys, tuo laikā tyka reikuotys lekcejis i darbneicys, dzyma jaunys rodūšys idejis, kū atainuoja ari muokslā – zeimiejumūs, kolažuos, vidis objektūs, kuri beja daīmami apsavieršonai foruma pādejā dīnā. Taipat itūs dīnu laikā tyka veiduotys jaunys draudzeibys i spa telpuos vītu atroda ari LMA Latgolys filialis studentu i Latgolys Muzykys i muokslys vydsškolys audziekņu dorbu izstuode “Plunkšķis”, kas papyldynuoja tukšuos spa centra telpys ar kruosom i muokslinīcysku jutūni. 

Deļkuo “Crossroads X Krustceļi”?

Ari iz itū vaicuojumu atbiļdi deve Raimonds Platacis, kas ir nūsaukuma “Crossroads X Krustceļi” autors. Jis stuosta: “Te ir īlykta ideja, ka cylvāku celi krystojās, jūmys krystojās, idejis krystojās, cylvāki krystojās i mes ite, Latgolā. Mums ir juoīt kūpā, kab mes varātu koč kū dareit. Mes vīni poši navarim eksistēt i byut! I mes, Latvejis Muokslys akademejis Latgolys filiale, kai organizatori saprūtam, ka varim krystuotīs ari ar cytom jūmom i byut iniciatori, kas veidoj tūs savīnuojumus, veidoj nūtikšonys, pīsaista cylvākus, ka mes asam tys regionalais muokslys centrys.”

Deļkuo taišni spa centrys? 

Pasuokuma organizatorim spa nabeja najauša izalaseišona. Tei sasasaisteja ar nūsaukuma izalaseišonu i jūmu dažaideibu, kurū pīminēja Raimonds Platacis. “Kam tys atainoj tū ideju par krystuošonūs, ka mes īmam kai tukša telpa, kas saīt kūpā ar muokslu. Tī ir tī krysta punkti. Prūtams, nav nūslāpums, ka publicitatis veiksmis moments beja itys spa, ka pošvaļdeiba mums īdeve spa centru. Mes eistineibā tykom pi cīši lelys interesis partū, ka tys nūteik itaidā veidā, itaidā kombinacejā, kas struodoj kai loba reklama.” 

Koč i Rēzeknis spa vys vēļ ir bez nūmnīka i tuo telpys kasdīnā ir tukšys, ari Rēzeknis pagaidu administracejis vadeituoja Guna Puce foruma pādejā dīnā pīminēja itū sadarbeibu kai vareibu spa pamaneišonai varbyut i kaida potenciala nūmnīka acīs.

Voi foruma nūdūms īsadeve?

Foruma atkluošonys dīnā, 24. martā, vaira nakai 60 cylvāki puļciejuos iz mūdis dizaina praksi muokslineicys Laimys Jurčys vadeibā. Prakse tyka baļsteita permakulturys principūs, apvīnojūt tradicionaluos kulturys zynuošonys ar modernū dizainu. 

Laima stuosta par projekta nūtikšonu i sasagataveišonu: “Beja cīši intensivys dīnys pyrma tuo, cikom es vysu saplānuoju, tok maņ beja cīši loba bāze, kam darbneicu baļsteju sovā doktoranturys pietejumā. Partū maņ tik beja juoizdūmoj, kai puornasu iz taidu četru stuņžu formatu sovu četru godu dorbu, i kai es varu maksimali i kvalitativā veidā cylvākim pīduovuot sovu jaunū praksis metodi.”

Iz vaicuojumu, kaida beja atsauceiba i auditoreja, Laima atsaceja: “Beja puorsteidzūšai loba atsauceiba, beja pīsarakstejuši 60 cylvāki. Maņ suokumā ruodejuos, ka tys ir joks, ka atīs kaidi 20, tok beiguos īraudzeju, ka ir pat vaira. Jamūt vārā tū, ka asam moza piļsāta, eistyn prīca par interesi i lelū atsauceibu. Nu vysaidu paaudžu i sferu beja saguojuši cylvāki.” Laima dasaceja: “Tei golvonuo dūma ir, ka itei jaunuo dūmuošona ir vajadzeiga, es radzu cylvāku interesi, ka pasaulī koč kas puorsamej, jauni veidi, kai mes varim vērtīs iz muokslu i dizainu.”

Foruma pyrmuos dīnys turpynuojumā i ūtruos dīnys suokuos sekuoja multimedials stuostnīceibys seanss ar Svenu Kuzminu, kurs aicynuoja iz foruma Latgolys gora izsaukšonu. Sovpus 25. martā forumu nūslēdze Raimonds Platacis ar darbneicu “X stuņdis marketings”, kur kūpā ar muokslinīkim, drūseibys ekspertim i komunikacejis profesionalim izstruoduoja jaunys krizis komunikacejis formys, analizejūt informacejis izplateišonys izaicynuojumus pīrūbeža regionūs i veidojūt praktiskus, rodūšus rysynuojumus efektivai sabīdreibys informiešonai uorkuortys situacejuos. 

Pasuokuma trešajā dīnā, 26. martā, spa telpuos nūtyka darbneica “Cylvāku radeita muoksla cylvākim”, kurū vadeja Latgolā dzeivojūša portugalīte, muokslineica Mafalda Garsija (Garcia), fokusejūtīs iz tuo, kai kūpīnu īsaistūšys muokslys praksis var boguotynuot publiskū telpu, styprynuot kulturys dzeivi i veicynuot pīdareibys sajiutu. Darbneicā pīsadaleja vaira nakai 20 cylvāki, tyka veiduotys diskuseju grupys, atbiļdāts iz vaicuojumim. Par darbneicys fokusu tyka izalaseita Rēzeknis piļsātys zīmeļu daļa, tautā zynoma kai “Severka”. Tyka runuots par tyltu kai savīnuojuma simbolu diveju piļsātys daļu vydā, kai itū tylta simboliku integrēt, kaidus muokslinīcyskūs i komunikacejis leidzekļus izmontuot, kab maklātu rysynuojumu sabīdreibys pīdareibys styprynuošonai Rēzeknē. 

Forums sātys čībeņuos i baseinā

Pādejā foruma dīnā gostus aicynuoja īsarast sātys čībeņuos i īkuopt baseinā voi vērtīs forumu tīšraidē, kū nūdrūsynuoja Latvejis Sabīdryskuo medeja portals Lsm.lv. Tim dalinīkim, kas īsaroda kluotīnē, beja vareiba ari pīsadaleit ekskursejā spa centrā i vaira izzynuot par tuo vareibom. Sovpus tim, kuri vērēs vysu tīšraidē, roduos vaicuojums, parkū Latgolā tai var īkuopt baseinā, bet Reigā nā?

Voi forumam “Crossroads X Krustceļi” byus turpynuojums? Raimonds Platacis tuo laikā saceja: “Es iz reizis pasaceišu, ka tys nav dūmuots kai taids serejis pasuokums, tok var tai izavērst. Nazynu, voi mums niu juodūmoj, kū mes pavasarī dareisim, varbyut, ka tymā laikā, kod nav vosora, kod ir klusais laiks, mes kai filiale varim aktualizēt muokslys vaicuojumus caur itaidim interesantim formatim. Varbyut itys turpynuosīs, ka es izdūmuošu lobuoku konceptu i nūsaukumu, tok tei ideja, ka mes kai LMA Latgolys filiale radeisim itaidys nūtikšonys, byus kai tendence. Kaidā veidā? Mes nazynim!”

Koč i foruma pādejā dīnā puorlīcynūšus vuordus par ituo projekta turpynuojumu navarēja dzierdēt, apreļa ūtrajā nedeļā socialūs medeju platformā Facebook Raimonds Platacis dalyka publikaceju ar tekstu: “Kai saceja vīns nu foruma apmaklātuoju: “Itei beja bomba, vajag vēļ” Partū mes, LMA Latgolys filiale, Latgolys Muzykys i muokslys vydsškola, “Neskarts” komanda asam gotovi sasadorbuot ar uzjiemiejim, privatajim, kai ari pošvaļdeibys īstuodem, kab jiusu telpu, pasuokumu, vītu pīpiļdeitu ar muokslu, cylvākim i jaunom perspektivom.” 

Galerejā atsavieršona iz muokslys forumu “Crossroads X Krustceļi”. Foto: Daiga Laizāne