Rokstu sagataveja: portals lakuga.lv

Rotko muzejs izsludynuojs kasgadejuos Latgolys regiona muokslinīku konkursa izstuodis temu, itūreiz tei ir “Pīrūbežs”. Kai īrosts, izstuode byus apsaverama muzeja pavasara sezonā, tok muokslinīki teik aicynuoti da 2. janvara tai īsnēgt dorbus, viestej muzeja puorstuove Inga Gedžūne.

Izstuode atkluos pīrūbežu kai vītu, kur rūnās izalaseišonys i puosameišonys – palikšonys i aizīšonys, tradicejis i laikmeteiguma, vītejuo i globaluo vydā. Eipaša nūzeime temys izalaseišonā ir poša Rotko muzeja kontekstam: ari ite nazkod beja rūbežs, nu kuruo Markam Rotko daguoja laistīs paceli iz naatsagrīzšonu, i tik piec vaira nakai godu symta juo dorbi ir simboliskai atsagrīzuši dzymtajā piļsātā.

Reizē ar pīrūbeža geografiskū kontekstu izstuode pīsavērss ari muokslai kai nūdarbei, kas poša par sevi pastuov iz rūbeža – normaluo i nanormaluo, pījamamuo i napījamamuo vydā. Muokslys byuteiba ir rūbežu puorbaude i puordefiniešona: tei marginalū padora radzamu, puorkuop vyspuorpījimtuos normys i atkluoj, cik plotys pīredzis i nūzeimis vēļ var smeļtīs nu dzeivis.

Tai pīrūbežs izstuodē puortaps par telpu, kur Latgolys muokslinīkim apcerēt i atkluot sovus personeigūs i rodūšūs rūbežus, reizē aplīcynojūt pīdareibu regionam i tuo daudzsluoņainajai identitatei. Puļcejūt vysaidu paaudžu i medeju autorus, tei paliks par sasatikšonys punktu muokslinīkim i dūs skateituojam vareibu īraudzeit Latgolu kai vītu, kur rūbeži nav tik linejis kartē, tok ari īdviesmis i jaunu vareibu olūts.

Izstuode “Pierobeža” byus apsaverama Rotko muzejā nu 2026. gods 20. februara da 24. maja. Pīsasaceit aicynuoti Latgolys regiona kulturtelpai pīdareigi muokslinīki – kai tī, kurūs dzeive i rodūšais ceļš ir saisteits ar Latgolu kai dzeivis, vuiceibu voi dorba vītu, tai tī, kurūs pīredzē Latgola saistuos ar eipašu īdviesmis i rodūšys atsaraiseišonys telpu.

Muokslinīki izstuodei var pīsasaceit da 2026. gods 2. janvara. Vaira informacejis par pīsasaceišonys nūsacejumim var izzynuot Rotko muzeja sātyslopā.