Rokstu sagataveja: portals lakuga.lv

2025. godā Latgolys hiphopa apvīneiba “Ausmeņa Records” aizsuoce darbeibu ari kai muzykys izdevnīceiba, daaicynojūt jaunus muokslinīkus. Vīna nu jūs ir DEI, kura sevi dasacejuse kai house/pop muzykys izpiļdeituoju. Niu DEI klauseituojim pīduovoj jaunu singlu i videoklipu “Muns boyfrends ir NEO”, kas īzeimej sūli iz prīšku juos rodūšajā atteisteibā.

Videoklips fiļmāts divejuos piļsātuos – Rēzeknē i Ludzā, kur DEI izauguse i meklejamys juos saknis. Fiļmiešonys pyrmuo dīna tyka aizvadeita APRC “Zeimuļs” telpuos, sovutīs urbanai muokslinīcysku jutūni papyldynuoja kadri, kas uzjimti dzeļžaceļa stacejā “Rēzekne 2”. Ludzā fiļmiešona nūtyka picerejā “Astotais rajons”. Scenareju taisejuse poša DEI, tok videoklipu fiļmēja i montēja Andis Stefanovičs.

“Klipa fiļmiešonys pīredzis maņ da šam nabeja, taipat ari scenareja raksteišona maņ beja nazkas pavysam jauns. Vystik piec pyrmuo singla izlaisšonys muzykys industrejā kūpā ar Ūgu mes iz reizis īrakstejom “Muns boyfrends ir NEO”, i jau tamā šaļtī zynuoju – itai dzīsmei nūteikti juotūp ari videoklipam.

Vysod beju sapynuojuse par sovu klipu, tok poša fiļmiešonuos maņ beja sveša i suokumā pat drupeit bīdynojūša. Par puorsteigumu sev pošai – vyss process nūtyka cīši dabiski. Fiļmiešonys laiks paskrēja natycamai mudri, i jau piec pyrmūs kadru uztraukums beja pagaiss. Par tū lels paļdis Andim i, prūtams, klipa partneram, kuri radeja drūsu i vīglu atmosferu.

Kai dzīsmis, tai videoklipa īdviesme īt nu kinys “The Matrix”. Itūšaļt dzeivojam muoksleiguo intelekta laikmatā, kur rūbežs storp eistū i muoksleigū palīk vys trausluoks, partū dūma par “izprogramātu” boifrendu redzīs eipaši aktuala. Itys klips maņ ir kai rūtaļa ar ideju – kas ir eists, kas ir radeits, i cik cīši mes poši šaļtim ļaunamēs iluzejom,” stuosta DEI.

Dzīsme atspīgeļoj dzierksti i kaisli attīceibuos, sovutīs tuos vizualajā i idejiskajā rysynuojumā jiutama atsauce iz kulta kinu “The Matrix”. Kompoziceja ir myusdīneiga, aktuala i vīgli baudoma. Pi muzykys pavadejuma tapšonys struoduojuši Nikita Grapps i Lakkey. Dzīsmis teksta autore ir Ūga, bet īroksts veikts Jezupa studejā Rēzeknē.

“Itei nūteikti ir kuortejuo meičuku himna. Rokstūt dzīsmis tekstu, beja svareigai saglobuot vīglumu i ironeju, reizē runojūt par attīceibom myusu dīnu digitalajā laikmatā. Itei dzīsme atspīgeļoj kotrys sīvītis dvēseli, kurai ūtruo puse ir IT sferā. Partū – sorgojam sovus NEO!” izasoka teksta autore Ūga.