Rokstu sagataveja: portals lakuga.lv

Hiphopa apvīneiba “Latgalīšu Reps” i dzīduotuoja Diona izlaiduši kūpeigu dzīsmi “Porke Parku” – emocionalu i atkluotu skaņdorbu par attīceibu lyuzuma punktu, kur diveji cylvāki nu vīnuota “mes” palīk par pretinīkim – kotrys ar sovu taisneibu, sovu suopi i sovu verseju par tū, kas nūguoja na tai, informej muziki.

Kai atkluoj apvīneibys “Latgalīšu Reps” dalinīki, dzīsmis idejis aizsuokumi meklejami, fiļmejūt videoklipu dzīsmei “Latgalita”. Fiļmiešonys aizkadrā, spielejūtīs ar vuordim portugaļu volūdā “por que?” i latgalīšu “parkū?”, kam ir vīnaida nūzeime, najauši roduos jaunuos dzīsmis koncepts. Tuos centrā ir vaicuojums, kas attīceibuos bīži palīk naatbyldāts.

“Dzīsme veiduota kai dialogs storp sīvīti i veirīti, izgaismojūt tū, cik vīglai tiveiba var puorsavērst naizprūtamā atsvešynuoteibā. Tei ir par šaļti, kod suocās ceiņa – na par cylvāku, kurū mīļoj, bet pret jū,” soka apvīneibys dalinīks Ivo Grigalis.

Dzīsme dasadur ari myusu dīnu attīceibu realitatei, kur socialūs medeju byušona kluotyn i uorejais tāls nareši traucej izveiduot patīsu saikni diveju cylvāku vydā. Skaņdorbā repa tīšums sasavej ar melodisku i emocionalu pīdzīduojumu, kurā attīceibu eksistencialūs vaicuojumus izdzīd Diona Liepiņa.

“Gatavejūtīs šovam “Koru kari”, kurā vadeišu Rēzeknis oranžū kori, daudzi laika otkon pavodu sovā školys dīnu piļsātā – Latgolys sirdī – Rēzeknē. Atsagrīzšona Latgolā ļuove krystuotīs ari munim i “Latgalīšu Repa” celim, i tyka sataiseita itei dzīsme. Juosoka, ka itei sadarbeiba izaveiduoja organiski – myus vīnoj kai latgaliskuo identitate, tai kūpeiga muzykaluo izjiuta,” stuosta Diona.

Dzīsmis teksta autori ir “Latgalīšu Repa” dalinīki Didzis Kozlovs i Ivo Grigalis, bet muzykys autors – muziku aprynduos augši nūvārtātais producents Jānis Šmēdiņš ci Fakts (Prime Time Studio).