1. decembrī Rēzeknē byus eipaša nūtikšona – jaunais Austrumlatvejis koncertzals svieteis vuorda dūšonys svātkus ar svātku koncertu „Baroka zeilis” (Baroka krelles).

Austrumlatvejis regionalais daudzfunkcionalais centrs ir tics pi skaneiga i apgaruota vuorda. Kai pašveikst koncertzala puorstuovi, logo spielejās storp latvyskū i latgaliskū, nu reizē ari dūd muojīni, ka pats nūsaukums ir latgalisks. Kaids taišni? Tys atsakluos reitu.

Pi koncertzala zeimula stuosta i dizaina taiseišonys struoduots ilgi i atbiļdeigi, da piļneibai sleipejūt kotru burtu, dūmu i pakruosu. Austrumlatvejis koncertzala zeimuls dzims zeimulu pereklī „Matka” i dizaina kompanejā „Asketic”.

1. decembrī 18:00 Rēzeknis kulturys nomā byus Austrumlatvejis regionaluo daudzfunkcionaluo centra vuorda dūšonys svieteišonys koncerts „Baroka zeilis”. Tymā byus vareiba dzierdēt pavysam jaunu kvartetu, kurymā muzicej Austrumlatvejis koncertzala orkestra dirigents Juoņs Stafeckis (kontrabass), Īva Salīte (klavesins), Agnese Kanneņa-Līpeņa (baroka skripka) i Ainis Zavackis (perkusejis). Koncertā skanēs A. Bertali, Heinriha I.F. fon Bībera, F.M. Veračini, Žana P. Ruajēra, J.J. Valtera i J.S. Baha dorbi.

Koncertu vysim muzykys meiļuotuojim ar prīcu duovynoj Austrumlatvejis koncertzala i īeja koncertā ir bez moksys.