Senejūs laikūs adventā cylvāki vokorūs saguoja kūpā nu vairuokom sātom. Struoduoja dažaidus dorbus, sīvītis sprēde, adeja, veirīši veja viervis, skolus plēse, i, lai eisynuotu laiku, vīns ūtram aizdeve meiklis. LaKuGa pīduovoj īsavērt latgalīšu folklorys kruotivē i zīmys vokorus eisynuot minūt meiklis.

Guļ kai komuļs, odotu pylns. (Ezs)
Kurūs traukūs navar nikuo īlīt? (Pylnūs)
Bryuns luocs pa zemi staigoj tārauda biksēs. (Orklys)
Rudinī boguota, pavasarī bedna. (Kliets)
Lela, gara tāva jūsta, navar pyurā salūceit. (Ceļš)
Symts ocu, bet naredz. (Sīts)
Mamzele koktā, kokls sasīts, moti vaļā. (Slūta)
Ar kū beidzās myužeiba? (Ar burtu „a”)
Vīns īt, divi rūnās. (Āna)
Divi kaimini, bet nikod nasasateik. (Auss)
Bārni tāvu pazeist, tāvs bārnus napazeist. (Bazneickungs i draudze)
Mute bez zūbu, bet kūku ād. (Kruosnis)
Rudinī pīdzymst, vosorā aug. (Zīmuoji)
Veireiņš mozs, raibi svuorki mugurā. (Dzeņs)
Trejas kuojas, sešas acis, tupu sovu myužu nūstaiguoja. (Pokovs)
Četrys kuojis, vīna capure. (Golds)
Gara, gara jumprova puorškaltu vādaru. (Obra)
Dzeivs ir, kust i šalkoj, tikai palīk iz vītys. (Mežs)
Ni ād, ni dzer, bet skrīnūt aug. (Spūle, komuļs)
Luocs aizīt, pādu naredz. (Kugis)
Četri taisa gultu, divi ruoda guni, vīns pots atsagulst. (Suņs)
Bolts ar malnu myužam mainuos. (Dīna i nakts)
Nikur naaug, bet zīmu pi lūga zīd. (Ladapuče)
Cytam kūž, pots rauds. (Zuodžs)
Nadzeivs dzeivam kuojis sylda. (Apavi)
Zalkts tynās, gola navar atrast. (Rateņa šņūre)
Tymā pat pļovā pļaun zīmu, pļaun vosoru. (Buordu dzan)

Karteņa: ekransuoveņš nu http://www.zudusilatvija.lv/objects/object/9465/

Ziņu sagatavieja V. Vilcāne