Grupys „Borowa Mc” dzīsme „Aizlaid pa viejam” tikuse 15 2012. goda vierteiguokūs pop i rok dzīšmu vydā – tys atsakluoja vakardīnys, 1. janvara Latvejis radejis 2. programys raidejumā „Muzykaluo banka”.

Pošuos Vacuo goda beiguos nūsaslēdze Latvejis radejis 2. programys pop i rok dzīšmu aptaujis „Muzykaluo banka 2012” finalbolsuojuma 1. kuorta. Tuos rezultatā tika nūskaidruots, kurys 15 nu 25 2012. goda dzīsmem ir tuos pošys vierteiguokuos. Vierteiguokūs dzīšmu vydā tika ari grupys „Borowa Mc” dzīsme „Aizlaid pa viejam”. Grupa cīši prīcojās par rezultatim i pasateic par bolsuošonu vysim atbaļsteituojim!

„Muzykaluos bankys” finala bolsuojuma ūtruo kuorta nūteik da 15. janvaram, kod bolsuot par dzīsmem var reizi dīnā aptaujis sātyslopā www.muzikalabanka.lv i speciali sataiseitā bolsuojumā portalā draugiem.lv. Bolsuošonys rezultati tiks apkūpuoti jauna goda janvarī, bet 2013. goda 26. janvarī svineigā ceremonejā Ventspilī i LTV1 tīšraidē nūskaidruos, kura tod ir ituo goda vierteiguokuo dzīsme. Finala ceremonejā uzastuos 15 vysvaira bolstu sajāmušī dzīšmu izpiļdeituoji. Taipat koncertā uzastuos ari muziki i muzykys eksperti, kas pīsadola dzīšmu viertiešonā ekspertu žurejis sastuovā: Raimonds Tiguļs i Kristaps Krīvkolns, kordirigents Ints Teterovskis, saksofonists Artis Gāga, dzīduotuoji Marts Kristians Kalneņš, Juoņs Stībeļs, Guntis Veits, etno instrumentaliste Laima Jansone i operdzieduotuoja Elīna Šimkus.

LR 2 „Muzykaluo banka” vierteiguokū dzīsmi nūsoka jau nu 2000. goda. Grupa „Borowa Mc” puorsteidze Latveju pyrmū reizi vierteiguokuos dzīsmis titulu dabuoja par 2005. godu i dzīsmi „Vyskaistuokai meitinei”, bet bolsuojumā par 2007. goda vierteiguokū dzīsmi grupa i dzīduotuoja Zane Dombrovska ar kūpeigi īdzīduotū dzīsmi „Puseite” dabuoja 12. vītu. Kai īs itymā reizē? Tys atkareigs nu klauseituoju atbolsta. Reizi dīnā bolsoj par grupu ITE.

Borowa Mc – Aizlaid pa viejam

Karteņā: grupa “Borowa Mc”, foto Madara Matisone