Itūgod nu 11. leidz 26. majam jau caturtū reizi vairuokuos Latgolys katuoļu bazneicuos nūtiks festivals „Latgales ērģeļu dienas”. Festivala mierkis ir popularizēt vargaņu spielis kulturu i latvīšu vargaņu muokslu, kai ari atbaļsteit vargaņu uzturiešonu i apkūpi. Vargaņu dīnys Latgolā īcarātys kai lobdareibys pasuokums – īeja koncertūs par zīduojumim. Ituo goda festivalā savuoktī zīduojumi tiks nūdūti vargaņu restauracejai Višķu bazneicā.

Vargaņu dīnu programa ir cīši plaša i daudzveideiga – Stiernīnē nūtiks tradicionalais nakts koncerts, Kruoslovā – tūpūšūs varganistu koncerts, Viļakā i Pušā – goreiguos muzykys koncerti, Aglyunā – kamermuzykys koncerts i nūslāguma koncerts Rēzeknē. Festivala eipašuo gaška ir storptautiski atzeituo muokslineica Iveta Apkalna, kas snīgs koncertu Kuorsovys bazneicā.
Itūgod vysūs koncertūs ar video projekcejis paleidzeibu varēs redzēt vargaņu spieli tyvumā. Taipat ari, turpynojūt tradiceju, piec koncertim klauseituojim byus īspieja vāruot instrumentu demonstriejumus, izdūt vaicuojumus vargaņu spālātuojim i paraudzeit sovus spākus spēlē.
Festivalā muzicēs Kristīne Adamaite, Iveta Pelše, Juoņs Pelše, Diāna Jaunzeme, Ilona Birģele, Larisa Carjkova, Jacinta Bicāne, Baiba Betlere, Laura Reksne, Laura Struķe, Daiga Maskaļūne, Līga Dzeriņa, Andrejs Ivanovs, Agnese Solozemnice, Ilze Cepurniece, Olita Pereca, Diāna Pilate, Diāna Zaharova i cyti.
Organizatoru aicynuojums iz „Latgales ērģeļu dienām”.

Festivala nūrise
11. majā 20.00 – Nakts koncerts Stiernīnis Sv. Laurenceja Rūmys katuoļu draudzis bazneicā
17. majā 20.00 – Aglyunys bazilika
18. majā 19.00 – Kruoslovys Sv. Ludvika Rūmys katuoļu draudzis bazneica
19. majā 19.00 – Vileks Vissv. Jezus sirds Rūmys katuoļu draudzis bazneica
24. majā 18.00 – Pušys Sv. Treisvīneibys Rūmys katuoļu draudzis bazneica
25. majā 19.00 – Kuorsovys Jaunovys Marejis – Rūžukrūņa karalīnis Rūmys katuoļu draudzis bazneica
26. majā 19.00 – Rēzeknis Jezus Sirds katedrale

Ziņu sagataveja: LaKuGa