Sastdtiņ, 18. majā Rēzeknē Latgolys viestnīceibā „Gors” 17:00 sovu pyrmizruodi pīdzeivuos jaunuokuo latgalīšu kina „Vīna vosora deļ vysu”.

Kina „Vīna vosora deļ vysu” ir myusu dīnu drama, kas stuosta par vīnkuoršu latgalīšu saimi, taidu pošu kai daudzejis niu Latgolā i Latvejā. Kinys varūņus skuoruse itam laikam tik īrostuo i tik suopeiguo problema – izceļuošona iz uorzemem, aizīšona nu dzymtuos sātys i saimis. Nazkod tyvu cylvāku dzeivis vaira nikod naīs pa vacam, atškierteibys laikā kotram ir izaveiduojuse sova pīredze i dzymušys sovys vajadzeibys i sovys nuokūtnis cereibys. Kinys centrā ir palicieju i aizbraucieju sasatikšona Latgolys sātā, tei ir atškireigu pīredžu i vajadzeibu sasadūršona. Kotram ir sova dzeive i sovs redzīņs iz lītom, tok, kab varātu sadzeivuot, ir juopījem cytu cylvāku izvēlis i tys par reizis nimoz nav tik vīglai i izdorams. Kotram sova dzeive, tik vosora deļ vysu vīna – laiks, kod raudzeit sasatikt i naizaškiert iz myužu.

Kinys režisors ir Edgars Blinovs (Latgolys entuziastu grupa BIĻDIS), vaira zynoms kai kinys „Latgolys laikadečs” (2011) režisors. Kinys filmiešona nūtyka aizvadeitajā vosorā Rēzeknis nūvoda Ūzūlainis pogosta Pauliņūs, Ruņču sātā, īsaistūt golvonū lūmu atveiduošonā gon Latgolā jau zynomus cylvākus, gon atkluojūt pavysam jaunus talantus. Kinā golvonuos lūmys atveidoj Daila Ekimāne, Diāna Bernāne, Ilmārs Dreļs, Andrejs Rudzinskis, Santa Seržante i daudzi cyti.

Ziņu sagataveja: LaKuGa