23. augusta vokorā Kūknesē i tīšraidē Latvejis Televizejis pyrmajā programā jau pīktū godu byus lobdareibys akceja „Top Latvijas Likteņdārzs!”, kurymā „Kūknesis fonds” vuoc zīdojumus Latvejis Liktiņduorza sataiseišonai – itūreiz taišni akmiņu kruovuma „Sirmais saulriets” taiseišonai, tai pa sūleišim pīsatyvynojūt golvonajam mierkim – Liktiņduorza duovynuošonai Latvejai tuos 100. jubilejā 2018. godā.

Itūgod iz lobdareibys koncertu sasapuļcēs Latvejis muzyki, kurūs vydā byus ari latgalīši. Koncertā muzicēs Uģis Prauleņš, Goran Gora, „Latvian Voices”, Kārlis Kazāks ar akceju „Velomūzika”, taipat Kūknesē dzīduos balvenīši „Audience Killers”, Biruta Ūzuleņa i „Dabasu Durovys”. Koncertu vadeis žurnalisti Juoņs Geste i Aija Kinca.

Liktiņduorza lobdareibys koncerta stuosts itymā godā aizasuoce jau sastdiņ, kod ar startu Zvuortovā sovu ceļu iz Kūknesi izsuoce Kārlis Kazāks i „Velomuzyka”. Jim prīškā 300 kilometru gars ceļš, kab 23. augusta vokorā ar ceļā satiktajim cylvākim i jūs stuostim finišātu Liktiņduorzā. Lela ceļa daļa vess cauri Latgolai – Bolvi, Bierpiļs, Viļāni ir viņ puora nūstuošonys i sasatikšonys. Ka sateikat ceļā – sveicinit!

Karteņā – Dabasu Durovys, foto Edeite Husare
Sagataveja LaKuGa