Ir taids jūks – „Kas ir Latgolys golvyspiļsāta? Vuordā ir pīci burti. Atbiļde ir REIGA, partū ka te ir daudz latgalīšu!” Reigā veikalūs, iz ūļneicys, sabīdriskajā transportā, teatrī i cytuos sabīdriskuos vītuos arviņ bīžuok var dzierdēt latgalīšu volūdu. Taitod Reigā latgalīši ir, i na vīns viņ.

Jaunīšu bīdreiba „Latgolys Studentu centrs” 18. septembrī aicynoj Reigys jaunūs, asūšūs i bejušūs studentus iz fotoorientiešonuos saceņseibom „Pyparmātru čaja kauss 2013”.

LgSC jau vairuokus godus Reigā, suokūtīs jaunajam vuiceibu godam, organizej orientiešonuos saceņseibys pa piļsātu. Kai saceņseibu nūsaukums īsaguojs „Pyparmātru čaja kauss”. Jaunajim studentim tei ir loba īspieja īpazeit Reigu i tuos latgaliskuos vītys, sovukuort reidzinīkim ar stāžu pasavērt iz tū ar cytom acim.

Ari itūgod byus juodora vairuoki aizdavumi – vajadzēs mudrys kuojis, partū padūmoj par ārtim apavim i drēbem, vajadzēs ari koč kū nūbiļdēt i nūfiļmēt, partū pajam leidza fotoaparatu, var izaleidzēt ari ar telefonu. Bet pats svareiguokais – leidza juojam ļusteigs pruots, lobs gorastuovūklis i gribiešona labi pavadeit laiku. Saceņseibys nūtiks komanduos, vari atīt jau ar sovu komandu ci vīns.

Sasatikšona 18. septembrī 18:30 pi Breiveibys pīminekļa. Kur bolts balons – tī mes!

Ziņu sagataveja: LgSC