Nu 15. novembra leidz 1. decembram Rēzeknē paradzāti kulturys pasuokumi, kas veļteiti Latgolys kulturys nedelis 55. godadīnai.

1958. goda 7. decembrī Reigā suocēs nūtikšonom boguota Latgolys kulturys nedeļa, kas beja leluokais latgalīšu kulturys pasuokums Latvejā pieckara godūs. Tymā pīsadaleja Latgolys kori, etnografiskī kolektivi, literati i muokslinīki. Dīvamžāļ cytus godus pasuokums vairuok nanūtyka, dreiži piec tam suocēs naoficialais latgalīšu drukys aizlīgums, kas ilga leidz pat atmūdai.

Itūgod Latgolys kulturys nedelis 55. godadīna tiks svieteita Rēzeknē.

25. novembrī Rēzeknis Centralajā bibliotekā tyka atkluota presis i daiļliteraturys izstuode “Latgales kultūras nedēļa Rīgā 1958. gadā”.

28. novembrī

19.00 Rēzeknis piļsātys kulturys noma foajē nūtiks Andreja Paulāna tautys lītiškuos muokslys studejis i tautys lītiškuos muokslys studejis “Dzīpariņš” dorbu izstuodis atkluošona.

20.00 Rēzeknis piļsātys kulturys noma Teatra zalā Baļtinovys teatra “Palādas” izruode “Ontans i sābri”.

30. novembrī

14.00 Rēzeknis piļsātys kulturys noma Teatra zalā Gaigalovys amatīrteatra “Bykovīši” izruode “Sīvysmuotis lobuo sirds”.

17.00 Rēzeknis piļsātys kulturys noma Koncertu zalā literari muzykals pasuokums “Andrejdienas – 15”, kurā paradzāta projekta “Lielvārdes josta” izdoncuošona kūpā ar deju kūpu “Dziga”, horeografu Ernestu Spīču, muokslineicu Sandru Sabīni Jaundalderi i kūklātuoju Rozīti Katrīnu Spīču, kai ari Rēzeknis Augstškolys literatu kruojuma i DVD “Kaunatys vītu vuordu stuosti” prezentaceja i sasatikšona ar dzejnīkim.

1. decembrī

15.00 Rēzeknis piļsātys kulturys noma Teatra zalā koncerts “Dainis Skutelis ar Belcanto orķestri”.

18.00 Rēzeknis piļsātys kulturys noma Koncertu zalā “Latgales kultūras nedēļa Rīgā” – 55. godadīnai veļteits dižkoncerts, kurā pīsadaleis Aglyunys bazilikys jauktais kors “Assumpta”, Rēzeknis Vyssvātuokuos Jezus Sirds Rūmys katuoļu katedralis kors “Adoramus”, Pūļu savīneibys Rēzeknis nūdalis kors “Jutrzenka”, Rēzeknis veiru kors “Graidi”, kai ari Juoņa Ivanova Rēzeknis Muzykys vydsškolys akordeonistu ansamblis.

28. novembrī 19.00–20.00, 30. novembrī 13.00–14.00 i 1. decembrī 17.00–18.00 Rēzeknis piļsātys kulturys noma Koncertu zalā nūtiks ari “Trīs Latgales garšas dienas”, kod byus īspiejams izgaršuot latgalīšu tradicionalūs iedīņus.

Ziņu sagataveja: LaKuGa piec pasuokuma organizatoru informacejis