Zīmyssvātku ailenis II
LaKuGa sovim skaiteituojim pīduovoj Zīmyssvātku ailenis. Tuos uzraksteitys dažaidūs laikūs i saglobuota autora laika volūda.
A. Lobreitiņš
Zīmassvātku naktī
Kad sirds tev klusa, mīrynōta,
Šei nakts ir visim izraudzeita,
Lai saskaņu un mīru rostu,
Un plauktu sirds, kas ilgi veita.
Šei nakts ir visim izraudzeita,
Un sirds, kas izmysumā dzeita,
Nyu līkās, bogōta un seita…
Šei nakts ir visim izraudzeita,
Lai saskaņu un mīru rostu.
*
Tu smaidi gaišu laimes smaidu,
Kad sirds tev klusa, mīrynōta,
Un breivōta nu sōp’u, vaidu,
Tu smaidi gaišu laimes smaidu,
Un ari breivs nu vacū naidu-
Klyust tova dzeive apgaismōta.
Tu smaidi gaišu laimes smaidu.
*
A. Lazdāne
***
Ilgu nakts ir pagōjuse,
Pravītōjums piļdejīs:
Jau vērs klusō Betlems staļa
Spūža zvaigzne īsamirdz.
Svāta nakts, vysapkōrt klusums.
Jezus bārns dus staleitī.
Debess pulki jaukōs skaņōs,
Prīceigi sveic bērneņu.
Un vērs staļa zvaigzne līsmoj,
Gaņeņus tei aicynoj,
Lai tī dovoj sovas sirdis
Bērneņam, kurs pīdzimis.
*
Jurs Pabērzs
Bārni Zīmassvātku reitā
Bārni seņ jau svātkus gaida –
Tod tīm prīca, laime smaida!..
Un raug, snīga sagā teits,
Atnōk Zīmassvātku reits.
Sōcās jaukō prīcas dīna.
Nūskumuša nav nivīna.
Ļauds uz bazneicu īt, brauc,–
Tur tūs zvona skaņas sauc…
Bārni mōjā palykuši,
Vysi kūpā sagōjuši,
Jautri stōjās dōrzeņā-
Laiku kavej puļceņā.
Vini, jautri skraideidami,
Lelā prīcā klaigōdami,
„Pūdus dauza”, „Vystas gyun”,
„Brauc uz mežu”, „kūrpes šyun”,
„Gona vuškas”, „kumeleņus”,
„Skustus pērk”, „mej gredzineņus”,
„Krējumu smeļ”, „mistūs brauc…”
„Peļu pulkā kaki sauc…”
Jautri, breivi skraideidami,
Jaukas dzīsmas dzīdōdami,
Loksta vini – prīceigi,
Bezryupeigi, laimeigi.
Piļneibu tī vysur mona –
Vysa teik jim, vysa gona:
Vysu dūd jim Svātku reits,
Boltā snīga sagā teits.
/1911. gods/
*
J. Sātmaļņīks
Svātku gaidōs
Pōri myrdzūšim kolnim
Un lejom jau dzēržamōk
Svātūs sūļu duņa
Nu tōlīnes klusi nōk.
Dzēržu tū pōrslom kreitūt
Un dzēržu, kad zvaigznes spuldz,
Un sirdī munā spējok
Asinis prīku guldz.
Svātu bejeibu kryutīs
Maņ šamā naktī kaids dadz,
Jo pōri myrdzūšim kolnim
Sirds myužeigu gaismu redz.
Karteņa: LaKuGys arhivs
