Vileks nūvoda bibliotekā (Pils īlā 2, Vilekī) 1. stuova izstuožu zalā apsaveramys gleznuotuoju nūvodnīku Annys Laicānis i Juoņa Laicānu gleznu izstuodis.

.
Juoņs Laicāns – muokslinīks i školuotuojs. Dzims 1954. godā. Vuicejīs Valmīrys rajona Kūcānu ostoņgadeigajā školā, nu 1967. goda – Vileks vydsškolā. Piec Rēzeknis lītišķuos muokslys vydsškolys beigšonys struoduojs ražuošonys apvīneibā „Latvejis keramika” Jelgovā kai muokslinīks, keramikis. Beidzs Latvejis Muokslys akademejis Latgolys filiali 1998. godā pi profesora Osvalda Zvejsalnīka. Diplomdorbs – glezna „Zīdūšuos uobelis”. Nu 1976. goda školuotuojs Vileks vydsškolā, nu 1996. goda – Vileks Vaļsts gimnazejā. Pīsadalejs Rēzeknis muokslys koledžys absolventu izstuodē „Muokslys izgleiteibai Rēzeknē 40”, Latgolys muokslinīku dorbu rudiņa izstuodēs Rēzeknē 2002., 2003., 2004. godā. Personalizstuode 1998. godā Rēzeknē.
Intereese par muokslu suocēs 60. godūs vacuokuo bruoļa Vladislava ītekmē, kurs beja gleznuotuojs autodidakts. Piečuok interesēja ari fotografeja i kino. Latvejis kinoamatīru bīdreibys bīdrs (1971–1998). 70. godu beiguos fotokluba „Gamma” bīdrs, kū vadeja pazeistamais žurnalists Aivars Āķis. Fotografeju apgivs Rēzeknis LMV.
Vilekī školuotuoja Rūdolfa Sauleiša vadeibā īsapaziņs ar dzintara i metala apstruodi i ar sovim dorbim 1969. godā puorstuov Latvejis školu jaunatni izstuodē Moskovā, kur sajam apbolvuojumu – bronzys medali.
Atmūdys laikā taisejs muokslinīciskū nūformiejumu vairuokom gruomotom par Vileki. Ir Vileks piļsātys gierbūņa idejis autors.
Gleznoj ainavys i klusuos dobys. J. Laicāna dorbi atsarūn Latgolys Kulturviesturis muzeja ekspozicejā „Latgolys gleznīceiba” Rēzeknē, privatkolekcejuos ASV, Norvegejā, Zvīdrejā i Latvejā. Nūsadarboj ar datorgrafiku i muzyku.
.
Anna Laicāne – dzymuse 1984. godā Bolvūs. Beiguse Vileks Vaļsts gimnazeju (2000), Rēzeknis Muokslys vydsškolu (2004), Latvejis Muokslys akademejis Latgolys filiali – gleznīceibys nūdaļu (2008). Latvejis Muokslys akademejis magistranturu – gleznīceibys nūdaļu A.Naumova i K.Zareņa meistardarbneicā (2010).
2007. godā struodoj par gleznuošonys i zeimiešonys pedagogu Rēzeknis Muokslys vydsškolā.
Izstuodēs pīsadola nu 2004. goda. Ir sareikuojuse vairuokys personalizstuodis Rēzeknē, Preiļūs, Bauskā, Reigā i c.
2006. godā sajāmuse pyrmuos pakuopis diplomu nu Baltkrīvejis Muokslinīku savīneibys Vitebskā storptautiskajā muokslys izstuodē – konkursā „ART SESSIO”.
Nu 2000. goda kotru vosoru brauc gleznuot plenerā kaidā nu Latvejis piļsātom. Eipaši tyvs muokslineicai ir ainovys žanrs. 2007., 2008. i 2009. godā pīsadola starptautiskajā jiurys gleznīceibys plenerā „Liepājas marīna” Līpuojā.
Dorbi atsarūn privatajuos kolekcejuos Latvejā, Zvīdrejā, Itālejā, ASV.
.
Izstuode apsaverama leidz martam bibliotekys dorba laikā: dorba dīnuos 9:00-17:00, sastdinēs 10:00-17:00
.
Informaceju i kartenis sagataveja Vilis Bukšs, Vileks nūvoda biblioteka

Nalela virtuala izstuode ari eipaši deļ LaKuGys skaiteituojim: