Jaunuo goda pyrmuo nedeļa Latgalīšu Kulturys gazetā īsasuokuse ar 18 jaunim rokstim par nūtykumim, procesim i cylvākim Latgolā i latgalīšu kulturā Latvejā.

Pyrmais ituos nedelis īroksts LaKuGā – Ilzis Spergys stuosts „Puika mežā”, kas īsuokts seņ, nu dabeigts viņ niu. Tai kai latgalīšu literaturā kotrs jauns dorbs ir prīceigs nūtykums, tod caram iz tū vacū ticiejumu – kai īsuoksi Jaunū godi, tai i pavadeisi – taitod: itymā godā juobyut daudz i lobim literarim dorbim latgaliski! Var saceit, ka ticiejumam ir sovs spāks – itymā nedeļā vēļ kaida prīceiga viests literaturys lauceņā – Preiļūs pyrmū reizi izdūts nūvoda autoru literarais almanahs.

LaKuGa viesteja, ka „Latvejis Aveizē” ituos nedelis suokumā beja publicāta interveja ar Tīslītu ministrejis parlamentarū sekretaru Juoni Bordānu – „Kod latgalīšu sirds ir pylna”. LaKuGā var puorskaiteit fragmentu latgaliski, nu pylnais saturs atrūnoms „Latvejis Aveizis” portalā.

Nedelis laikā atsavērem iz pasuocīnim, kas aizvadeiti i aicynuojom iz paradzātim. Var saceit, ka nedele paguojuse Zīmeļlatgolys zeimē – viestejom par vairuokim nūtykumim nu Zīmeļlatgolys pusis – stuostejom par Ontona Slišāna pādejuos gruomotys bārnim „Labi, ka labi” izīšonu i īsavierem atkluošonys pasuocīnī Upeitē, stuostejom par Latgolys folklorys vuokuma konkursa „Apleicīne”, kū organizieja Bolvu Centraluo biblioteka, rezultatim, kai ari nūskaidruojom, kaidi tod beja Vacgoda karnevala puorsteigumi Upeitē. Taipat atsavērem iz vokaluo ansambļa „Knifs” pīcu godu jubilejis koncertu i Latgolys tierdzeņu Reigā video versejā. Nedelis laikā aicynuojom iz Audreņu tragedejis pīminis pasuocīnim, Latvejis – Čehejis sakaru izstuodis atkluošonu, lobdareibys koncertim Latgolys bazneicuos, kurūs teik vuokti leidzekli futbolista Krišjuoņa Vallera uorsteišonai, aicynuojom iz vargaņu naktskoncertu Aglyunā, taipat pa itū nedeli nūtyka kulturys ministris gasteišona Rēzeknē, jaunuo Austrumlatvejis koncertzala kakažu svātku svieteišona i latgalīšu braucīni atbaļsteit hokeja komandu „Dinamo Rīga”.

Pyrma laiceņa LaKuGā beja viests par latgalīšu pretendentim iz Latvejis Muzykys īrokstu Goda bolvu. 5. janvarī tyka nūsaukti žurejis izvirzeitī nominanti i prīca zynuot, ka jūs vydā ir gon Sovvaļnīks nominacejā par „Lobuokū Rock albumu”, gon Ilža nominacejā par „Lobuokū tautys muzykys albumu”.

Paguojušuo goda beiguos Kulturys ministreja beja izsludynuojuse sabīdreibys integracejis konkursu ar finansejuma paredziešonu ari latgaliskim projektim. Itymā nedeļā publiski tyka nūsaukti finansejuma sajiemieji i jūs vydā ir ari poša LaKuGa! Taipat apstiprynuots vēļ vīns bīdreibys „Latgolys Studentu centrs” projekts par latgalīšu volūdys izbraukuma stuņdem i saļnovīšu projekts par teatra izruodi.

Bīdreiba „Latgolys Studentu centrs” itymā nedeļā parakstejuse ari sadarbeibys memorandu storp navalstiskajom organizacejom i Ministru kabinetu.

Kai ari zam beigu – kas tod ir LaKuGa bez tradicionalajom kasmieneša i kasnedelis lītom – Latgolys Vuords nu Reigys ari itymā nedeļā.