Kod gods aizvadeits, tai viņ gribīs atsavērt, kaids tod tys bejs, kab ar jaunu dorba sporu suoktu cytu. Ari bīdreiba „Latgolys Studentu centrs” (LgSC) atsaver iz aizvadeitū godu.
.
Puosokys par krīzi
2011. gods „Latgolys Studentu centram” lelā mārā paguojs pošu izdūtuos gruomotys „Es soku. Tu soki. Puosokys par krīzi” zeimē. Gruomota tyka izdūta zeimeigā datumā – 27. majā, kod teiri teoretiski var saceit, ka Latvejā izabeidze krīze. Drupeit rodūša pīguojīņa, „sadarbeibys” ar Ministru prezidentu Dombrovska kungu – i par gruomotu „Es soku. Tu soki. Puosokys par krīzi” zynuoja ari tī, kas kasdīnā varbyut nikod latgalīšu gruomotys rūkā nav turiejušs. Kotrā ziņā – tik daudzi kameru i filmietuoju pasuocīnī prīca byutu redzēt sevkuram sabīdryskūs attīceibu i medeju specialistam!
.
Literatura i muzyka rūkrūkā
Literari muzykali pasuocīni ir taids pateiceigs formats, kod sabīdreibys interesi var pīvierst gon latgalīšu literaturai, gon muzykai, i breineigi, ka saīt obejim iz reizis. 2011. godā beja gon kasgadejī pasuocīni, gon roduos ari jauni, kurūs gon sevi paruodeit, gon prīceit atguojušūs interesentus vareja latgalīšu muziki i autori. Nu tradicejom veiksmeigi tyka turpynuotys vairuokys: nakomercialais, nagudrais i nanormali glaunais „Tievanānu čulans”, kura aktivitatis nūtyka na viņ, kai īrosts, Viļānūs, bet ari Nagļūs, „Vāluo rudiņa” īsuoktū turpynuoja muzykali literarais pasuocīņs Latvejis Nacionalajā bibliotekā – „Agrais pavasars”, taipat goda beiguos Raiņa sātā „Berkenelē” Daugpiļs nūvodā ļauds ar prīcu par ailem i latgaliskū muzyku sasatika „Latgalīts latgalīšam draugs” piecpušdīnē. Kasgods ari LgSC pīsadola Dzejis dīnuos i 2011. godā pi seve gostūs iz latgalisku dzejis vokoru aicynuoja Raiņa i Aspazejis sāta Reigā. Pyrmū reizi Rēzeknē Latgaļu Rakstnīceibys muzejā nūtyka dzejisks pasuocīņs „Vuordu meitovys”. Pi tradicejom – taipat ar sovom aktivitatem LgSC pīsadaleja muzykys festivala „Muzykys Skrytuļs” nūrisēs i ar sovim spākim i īspiejom atbaļsteja ari koncerta „Taiseits Latgolā” nūtikšonu Reigā, LMA Studentu klubā.
.
Poši sev i cytim
Koč ari LgSC pasuocīņu vydā ir daudzi publisku, iz kurim ir aicynuots sevkurs interesents, gona ari taidu pošu prīcai, kurūs, prūtama līta, bīdreiba prīcojās redzēt ari jaunys sejis. Dažaidi pasuocīni i aktivitatis regulari nūtykuši vysūs LgSC birojūs – Reigā, Daugpilī i Rēzeknē.
Vīns nu interesantuokajim „projektim”, kurā tyka apvīnuotys tradicejis i modernuo kultura, saguoja Donata dīnys svineibys Reigā, kod dzyma folklora – Donata dīnys ticiejumi i naiztyka bez amerikaņu donatim. Taipat goda laikā naiztykom bez tradicionalajom sasatikšonom ar padzīduošonu folkklubā „Ala pagrabs” Reigā, Daugpiļs kojuos i Rēzeknē. Beja gon Zapts stiklineica, Sasavasaluošona, pikniki, sportiskys aktivitatis, projektu raksteišonys, ideju vātrys, naformalys latgalīšu volūdys stuņdis, piparkūku cepšonys i vēļ vysakuo. Tradicionala sasatikšona sovejim i na tikai turpynuojuos ari pasuocīņu cikla „Latgalīša pādi pasaulī” ītvorūs – virtuali izbraukuojom Eiropys ceļus, bejom Indejā i gastejom ari Australejā.
Vairuokūs pasuocīņūs guojom gostūs ci aicynuojom gostus pi seve. Tai majā pīsadalejom ar sovu tvistera spēlis latgalīšu verseju „Zyrga dečs” ari Latvejis Universitatis reikuotajā pasuocīnī LU Sāta, vosorā Viļānūs kūpā ar Mozuos kavalerejis (ceļojūša, darbeiga, muzykala i īdvasmojūša draugu i dūmubīdru kūpa, kurys lela daļa puorstuovu zynomi ari kai Imanta Zīdūņa fonda „Viegli” aktivisti) dalinīkim padarejom šmukuoku Trūpu (Kaupra) Valnakmini pi Viļānu. Kūpā ar Latvejis Aizsorgu organizaceju guojom puorguojīnī pa Preiļu apleicīni, svietejom Latvejis dzimšonys dīnu. Sadarbeibā ar kinys „Latgolys laikadečs” veiduotuojim organiziejom kinys seansu ari Reigā, par prīcu Rēzeknis Augstškolai spākus fiļmiešonā paraudzejom ari poši.
.
Gruomotu nūdaļa
2010. godā asuoktais dorbs pi latgalīšu gruomotu, muzykys īrokstu i suveniru golda uzturiešonys turpynuojuos ar vēļ leluokim apgrīzīnim ari 2011. godā. Daleiba gruomotu tiergūs, piļsātu svātkūs, latgalīšu pasuocīņūs i cytur – veids, kai LgSC ar sovu breivpruoteigūs paleidzeibu raudzeja paleidzēt latgalīšu gruomotu i muzykys izdeviejim atrost sovu piercieju i naļaut latgaliskajam nūputēt plauktūs, bet pierciejam i cytim interesentim paruodeit gruomotu dažuodeibu, kas pīeimama ari latgaliski.
.
Rodūšais konkurss
Ari 2011. godā LgSC turpynuoja tradiceju par latgaliskuos raksteibys veicynuošonu jaunu ļauds (školānu i studentu vydā), reikojūt rodūšūs konkursus. Tai pyrma vaļsts svātkim nūtyka rodūšais konkurss „Sorkonboltsorkonuos kruosys lai zīd”, kas prīcēja ar sovim rezultatim i paruodeja, ka Latgolā ir školāni, kas jādz i var raksteit labi latgaliski – gon saturiski, gon piec formys.
.
Projekti
Vysaidi pasuocīni i dareišonys ir breineiga līta, bet, kab tys vyss nūtyktu, bīži viņ vajag ari finansialys podturiešonys, deļtuo LgSC ceņteigi raksteja, realizēja i turpynuoja atteisteit daudz i dažaidus projektus. 2011. goda februarī nūslēdzem bīdreibys kapacitatis ceļšonys projektu, kū atbaļsteja Islande, Lihtenšteina i Norvegeja EEZ finanšu instrumenta i Norvegejis finanšu instrumenta ītvorūs i Latvejis vaļsts ar Sabīdreibys integracejis fonda storpnīceibu. Pīsadalejom Vaļsts kulturkapitala fonda projektu konkursūs, gon poša fonda organizātūs, gon caur Latgolys reigona kulturys programmu, i sajiemem finansiejumu jaunu latgalisku gruomotu izdūšonai 2012. godā. Ar Nūdarbynuoteibys vaļsts agenturys programmys „Atbalsts jauniešu brīvprātīgajam darbam” paleidzeibu LgSC veicynoj jaunīšu bezdarbnīku īsaisti breivpruoteigojā dorbā i snīdz īspiejis sajimt stipendejis vairuokim Rēzeknis jaunīšim-bezdarbnīkim. Ar Kulturys ministrejis atbolstu goda beiguos sajiemem finansejumu divejim projektim – latgalīšu kulturys gazetys lakuga.lv atteisteibai i latgalīšu volūdys izbraukuma stuņdem Latgolys školuos.
.
Medeji
Tai ir saguojs, ka itys gods bīdreibai „Latgolys Studentu centrs” ir bejs boguots ari ar dažaidom publiskom pasaruodeišonom. Vasalys treis reizis goda laikā asam intervāti radejis raidejumā „Latgolys Vuords”, bejušs speciali sižeti televizejis raidejumā „Vyss nūteik”, pīsadalejom portala www.diena.lv „Dīnys gostu ustobys” diskusejā par latgalīšu spāku, kai ari par myusu projektim i dorbim bejušs publikacejis drukavuotajūs medejūs, sižeti i roksti cytur škārsteiklā, radejuos i televizejuos – „Latvejis Aveizē”, „Ir”, TV3, LNT, PBK, LR1 „Gruomotu apskotā” i cytur. Goda beigu daļā ūtrū elpu devem ari vīnam sovam medejam – latgalīšu kulturys gazetai „LaKuGa” i cīši cerejam veiksmeigi ar tū turpynuot ari iz prīšku.
.
Daudz dareits, padareits, vajadzātu vēļ izdareit – taids tys 2011. gods bejs „Latgolys Studentu centram” i tikpat pasuocīnim i nūtykumim boguoti i darbeigi cerejam ari nūdzeivuot tū 2012.
.
Foto šaļteņu kolaža – Latgolys Studentu centra 2011. gods