2013. goda 28. decembrī dzejnīks, publicists, folklorys vuociejs i pietnīks, kulturys darbinīks, Latvejis patriots, latgalīšu volūdys aizstuovs Ontons Slišāns tai saulē smaideja, kam Slišānu saime, Ruta Cibule, konkursa „Apleicīne 3” dalinīki, tielnīks Vitālijs Peļņa i daudzi cyti lobys grybys cylvāki pasaryupēja, lai Ontonam Slišānam 65.jubileju atzeimātu ar treis nūzeimeigim nūtykumim ci dzimšonys dīnu svieteitu treis daļuos.

Konkurss „Apleicīne”

Piec Ontona Slišāna aizīšonys myužeibā 2010. goda nūgalē, Bolvu Centraluos bibliotekys vadeituoja Ruta Cibule saprota, ka navar atstuot bez īviereibys Ontona Slišāna myuža dorbu – folklorys vuokšonu –, deļtam topa Latgolys folklorys vuokuma konkurss „Apleicīne”, kas veļteits dzejnīka, nūvodpietnīka, folklorys vuocieja i bibliotekara Ontona Slišāna dzeivis zinis pīminiešonai. 2013. goda nūgalē nūsasliedze trešais „Apliecīnis” konkurss. Tymā īsnīdze 7 folklorys vuokumus. Viļakys nūvodu konkursā puorstuovēja Vacumu pogosta bibliotekaris Aijys Locānis īsnīgtais kuodreizejuos bibliotekys vadeituojis Anitys Bernackys folklorys vuokums „Vecumu bibliotēkas mikrorajona folklora”, Škilbanu pogosta Rekovys cīma īdzeivuotuojys Lucijys Ercikys folklorys vuokums, Rekovys vydsškolys škoļneicys Daigys Keišys folklorys vuokums par babys, Upeitis etnografiskuo ansambļa dzīduotuojis, teiciejis Valentinys Keišys boguotū folklorys montuojumu i Ontona Slišāna meitys Māreitis Slišānis dorbs „Vīnys sīvys stuosts. Par Rozāliju Slišāni”.

Pīmineklis Ontonam Slišānam – Myuža gruomota

2012. godā Upeitis kulturviesturis muzejs izsludynuoja konkursu Ontona Slišāna pīminekļa skicei. Itymā konkursā par lobuokū tyka atzeits tielnīka Vitālija Peļņys dorbs „Myuža gruomota”. 2013. godā Upeitis kulturviesturis muzejs pīsaisteja finansiejumu nu VKKF, Viļakys nūvoda dūmis, Baļtinovys nūvoda dūmis, Ontona tivinīkim, cytim zīduotuojim i Ontonam iz 65 godu jubileju izduovynuoja pīminekli „Myuža gruomota” Ontona atdusys vītā Brieksīnis kopsātā.

Pīmineklis ir izkolts nu bolta granita gruomotys formā, iz vuoka malnajā granitā atveiduots Ontona portrets, kur storp gruomotys puslopom īlykta lopa – gruomotzeime, iz kurys Ontona rūkrokstā raksteits:

„nivīns maņ naatnyms šo skaņuo bolsa,

nivīns maņ naatnyms šūs vuordu,

kas dzymst ar volūdu nu dvieselis.”

Lels paļdis par finansialū atbolstu pīminekļa tapšonā Kulturkapitala fondam,Viļakys nūvoda dūmei, Baļtinovys nūvoda dūmei, Ontona Slišāna saimei i vysim, vysim zīduotuojim.

Dzimšonys dīnys nūslāgums Upeitis tautys nomā

Piecpušdinī daudzi Ontona Slišāna myuža cīneituoji puļcējuos Upeitis tautys nomā, lai kūpā dareitu tū, kas ryupēja Ontonam. Laseja i skaiteja dzeju, dzīduoja, muzicēja, doncuoja i beiguos pasamīluoja, ādūt gordū dzimšonys dīnys kriņgeri. Upeitis tautys noma foajē beja apsaverama izstuode nu treis daļom: Māreitis Slišānis veiduotuo fotografeju kolaža, Upeitis bibliotekys izlyktuos Ontona Slišāna gruomotys i Upeitis kulturviesturis muzeja reikuotuo bārnu i jaunīšu Ontona Slišāna portretu izstuode. Pats naparostuokais Ontona Slišāna portrets atsaroda zālē, tū beja izadejuse Ontona Slišāna meita Lienīte Slišāne.

Myusim nav sev naskaitomys reizis juoizdūd vaicuojums: deļkam Ontons Slišāns aizguoja myužeibā tik uotri? Myusim sev ir juoizdūd vaicuojums: kū es varu dareit, lai turpynuotu Ontona Slišāna īsuoktūs dorba vierzīņus?

Ontona Slišāna 65 godu jubilejys atceris pasuokums „Ir meili te maņ, kur pasauļs vyss munā volūdā skaņ” īsasuoce ar etīdis spieli, kur Upeitis jaunīts Renārs Kornejs attāluoja Ontonu Slišānu, runuodams tai, kai runuoja Ontons. Tys paleidzēja kluotasūšajim saprast, ka myusu aizdavums ir turpynuot kūpt sovu zemeiti, mīļuot sovu zemi i tyvuokūs.

Pasuokumā vysim interesentim beja ari īspieja daleitīs atmiņuos par Ontonu Slišānu.

Paļdis Upeitis pamatškolys škoļnīkim Katei Slišānei, Dominikam Slišānam, Salvim Loginam, Sindijai Loginai i Ontona unukam Osvaldam Rozem par dzejūļu skaiteišonu, muziciešonu i dzīduošonu, folklorys kūpai „Rekavas dzintars” par skaneigū dzīduošonu. Paļdis par doncuošonu Medņevys pogosta mozajim doncuotuojim, Rekovys vydsškolys deju kolektivam i kolektivu vadeituojai Aijai Leitenai. Paļdis DaGunči nu „Bez PVN” par dzīsmys saceriešonu ar Ontona Slišāna vuordim, baļtinavīšim par atjauteigū apsveikumu. Vysleluokais paļdis Upeitis etnografiskajam ansambļam, Upeitis jaunīšu folklorys kūpai i Upeitis bārnu kapelai.

Sekuosim Ontona Slišāna pīmāram, lai nabyutu kauns sasatikt nuokamajūs pīminis pasuokumūs!

Ziņu sagataveja: Vineta Zeltkalne, Andris Slišāns
Karteņa: Vineta Zeltkalne