Kur Tu byusi. Voi pīturā? Voi aiz sātys styura, pīsakļuovs sīnai? Voi maņ aiz mugurys? Voi maņ pretī īsi? Var jau byut, ka mes jau ajam vīns ūtram pretī. Nazynūt. Es tevi ilgi gaidu.

.
Sekundis vysys vīnaidys, vīnaiž syt, vīna pauze. Kalenders šķirās pots nu sevis. Četrys nedelis. Tuos pošys, vīnaiž garys. Vīna nakts piec ūtrys. Atīt vīnaiž tymsai. Naradzu vairs horizonta. Izkreit spolva nu rūkys. Vairs es naraksteišu. Sirdī tintis par moz. Nav Tevis, kas uzpiļdeitu. Sauss kai tuksnesī. Dadzynoj dūmu saule. Pogolms tukšs, izslauceits. Es Tevi ilgi gaidu.

.
Žuovojūs, rūkys augšup ceļu, acis veru vaļā, berzeju, pi olūta aju seju mozguot. Atspulgā naradzu Tevi. Bet īsadūmoju. Spieji grīžūs, lai paspātu Tevi vēļ nūgiut. Tevis nav. Verūs apleik. Bosom kuojom aju pretī. Ceru, ka tu ari. Klusi dzīdu pi sevis. Lai nūsystu laiku. Laiks zylumūs sasysts. Es vaineiga. Es Tevi ilgi gaidu.

.
Kur Tu byusi? Kartē Tevis nav. Navigācejis sistemā nav. Google.com Tevis nav. Zvonu 1188, Tevis napazeist. Es grybu klīgt. I es klīdzu. Vyss sastyngst ap mani. Bet es trokoju. Es smejūs. Bet Tevis jūprūjom nav. Es raudu. Bet Tevis jūprūjom nav. Osorys plyust puor munim vaigim tik ilgi leidz tuos jau bierst kai suoļs iz zemi. Saberu smiļšu pulkstinī. Skaitu kotru osorainū sekundi. Leidz otkol pīnuok vokors, nūgurums spīž mani dūtīs pi mīga. Bet sapnī? Es Tevi ilgi gaidu.

.
Leidz pat nuokušuos dīnys reitam, kod pasamūstu. Tys nasabeidzās. Skrīnu, naādus brūkaškys, varbyut Tev pretī. Es sev īstuostu, sevi puorlīcynoju, uzmundrynoju, līku pasmaidiet. Es zynu, ka Tu sajussi gaismu. Maņ tikai juoturpynoj smaidiet. Es Tevi ilgi gaidu.