Nu 4. leidz 6. apreļam vaira nakai 80 vītuos vysā Latvejā nūtiks pasuokums “Satiec savu meistaru!”. Sevkurs ir aicynuots apmeklēt meistardarbneicys, individualuos nūdarbeibys, atvārtuos darbneicys, paraugdemonstrejumus, lekcejis, prīšklasejumus, koncertus i daņčus. Daudz vysaidu nūtikšonu paradzāts ari Latgolā.

Tautys lītiškuos muokslys meistarus, stuostnīkus, tautys teiciejus i muzykantus, kai ari cytus tradicionalūs prasmu i omotu zynuotuojus varēs satikt darbneicuos, studejuos, muzejūs, školuos, kulturys centrūs, bibliotekuos i pat meistaru dzeivisvītuos.

Pasuokumā byus īspieja apgiut ausšonu, pierts gudreibys, tradicionalū muziciešonu, kūkgrīsšonu, adeišonu i daudzys cytys tradicionaluos prasmis.

Ar meistaru sarokstu var īsapazeit ite.

“Satiec savu meistaru!” ir 2009. godā aizsuoktuos Tradicionalūs prasmu školys turpynuojums, kas īkļauts kūpeigā Eiropys projektā “Eiropas amatu prasmju dienas”. Leidzeigi pasuokumi, kur tradicionalūs prasmu zynuotuoji uzjam pi seve muocekļus, reizē nūteik ari Francejā, Spānejā, Italejā, Beļgejā i cytuos pasauļa vaļstīs. Aizvadeitajūs godūs “Satiec savu meistaru!” apmekliejuši vaira nakai 10 tyukstūšu vysaidu paaudžu interesentu, i kotru pavasari pasuokums sabīdreibā ir atzeits par gaideitu nūtykumu.

Pīsadaleit pasuokumā „Satiec savu meistaru!” aicynoj Latvejis Nacionalais kulturys centrs sadarbeibā ar Latvejis nūvodu i piļsātu pošvaļdeibom.