Portals diena.lv ziņoj, ka 28. aprelī pasauļa pyrmizruodi prestižajā dokumentalūs kinu festivalā “Visions du Réel” Nionā, Šveicē pīdzeivuos režisora Vīstura Kairiša poetiskais i filozofiski ītiļpeigais viestejums par Latgolu – “Pelikāns tuksnesī”.

Kina asūt episks viestejums par režisoram tyvū Latgolu, tuos eipašū mageju i ari pūstu. Pastuoveiguo religejis kluotbyutne, cylvāku kasdīnys dzeivis rytums, dobys dyžanums, dzeiveiba i nuove – tys vyss operatora Ginta Bierzeņa gleznuotajūs skotūs sasavyn ar Gustava Mālera muzyku, rodūt pīminekli zemei, kū režisors sauc par myusu zudušū Atlantidu.

“Itei kina ir viestejums par Austrumlatvejis nūvodu, vaļsti vaļstī, Latgolu, kas ir zeme iz Eiropys Savīneibys tuoluokuos austrumu rūbežys. Reizem tei atguodynoj iudinim īskautu solu, bet reizem tuksnesi, kurā īputynuots škiersts ar izgluobtū ciļvieci. Te volda vysaugstuokuo gareiguo sprīdze Latvejā – itys ir katuoļu regions, pylns ar pareizticeigajim, vacticeibnīkim i sagrautim jūdu dīvnomim. Itei zeme izzyud sovā eipašajā pastuoviešonys veidā, kas godu symtim ilgi padarejs Latgolu par savrupu i magisku vītu. Kina ir viestejums par kulturys i civilizacejis izzusšonu, sovys cytaideibys zaudiešonu, kas ir dabiska paruodeiba. Reizē tys ir taidys zemis portrets, kuru veidoj cylvāki, dzeivis gareigais i fiziskais ekstremisms i kristeiga augšamceļšonuos. Latgola ir cīši reala zeme, no kurys asmu cielīs. Reizē tei ir zeme, kurā es globojūs, atsateistu i gluobūs. Itei zeme maņ bīži kliust par dzili īkšeju i nūslāpumainu procesu metaforu,” par kinu stuosta Kairišs.
Latvejis skateituoji ar “Pelikānu tuksnesī” varēs īsapazeit maja vydā, kod kina pīdzeivuos sovu nacionalū pyrmizruodi kinoteatrī “Splendid Palace”.

Informacejis olūts: diena.lv
Karteņa: skots nu kinys