Daugovpiļs nūvoda pošvaļdeibys agentura “TAKA” aicynoj izbaudeit vosoru, pavodūt tū ļusteigā i muzykalā gaisūtnē Višku estradē! Muzykaluos vosorys ītvorūs sevkurs varēs atrast sovai gaumei pīmāruotuokū izpiļdeituoju i izadoncuot jautrā zaļumbalā!

Suocūt ar maju, vysys vosorys garumā, kotra mieneša pādejā pīktdīnē sevkurs teik laipni gaideits Višku estradē, kur byus īspieja baudeit muzyku i dejis kūpā ar Latvejā popularom i īmeiļuotom grupom.

30. majā vosoru īskandynuos grupa “Galaktika”, kura jau vairuokus godus piec kuortys ir dabuojuse Latvejis popularuokuos šlāgermuzykys grupys titulu. Pasuokuma suokums 21.00.

23. junī ļustēsim lelajā Leigū pasuokumā, kurā kūpā ar vysaidim īmeiļuotim izpiļdeituojim, Višku pogosta jauktū kori, folklorys kūpom i deju kolektivim gūdynuosim latgalīšu Leigū svātku tradicejis. Pasuokuma suokums 18.00.

25. julī sevkurs vosorys baudeituojs nu 21.00 teik aicynuots iz zaļumbalu leidz reita gaismai grupys “Ginc un es” pavadeibā.

Muzykaluos vosorys izskaņā – 29. augustā – dzeivuos muzykys festivals ar Juri Ostrovski nu grupys “Patrioti.lg”, kurā byus īspiejams dzierdēt Latgolā īmeiļuotu izpiļdeituoju kompozicejis dzeivajā skaniejumā. Pasuokuma suokums 21.00.

Sasatiksim muzykaluos vosorys pasuokumūs Višku pogosta estradē, baudeisim vosoru i lobu muzyku!

Muzykalū vosoru Višku estradē atbolsta: Daugovpiļs nūvoda dūme, Višku pogosta puorvaļde, laikroksts “Latgales laiks”, vīsneica “Latgola”, Latgolys regionaluo televizeja, portals LaKuGa, Daugovpiļs Universitate, “Cēsu alus”.