Baļtinovys nūvods ir pats mozuokais nūvods Latvejā, tok aktivu i dorbuotīs grybūšu ļaužu tymā natryukst. It eipaši darbeiga vosora i gods kūpumā itūgod izavierts bīdreibai “Sukrums”.

Īsasuocūt jaunajam godam, tyka izstruoduots projekts Sabīdreibys Integracejis fondam ar nūsaukumu “Mācāmies būt par sava amata meistariem”. Projekts tyka apstyprynuots i suocūt ar 2014. goda 1. augustu tiks uzsuoktys aktivitatis tuo realiziešonai i izvirzeitūs mierku sasnīgšonai. Projektu finansiali atbolsta Islande, Lihtenšteina i Norvegeja. Kūpejuos projekta izmoksys sastuoda 20 637.79 EUR, nu kurom 89,98% sastuoda Sabīdreibys Integracejis fonda finansiejums.

Projekta “Mācāmies būt par sava amata meistariem” ītvorūs darbeibys i aktivitatis vārstys iz socialuos atstumteibys i nabadzeibys riskam pakļautajim dzeivuotuojim. Golvonuo projekta ideja ir veiduot dokumentalūs sižetus par nūvoda omotnīkim i jūs panuokumim. Bīdreibys “Sukrums” prīšksādātuojs Aigars Keišs uzsver, ka itaida veida dokumentalī sižeti varātu kolpuot par motivaceju cytim nūvoda dzeivuotuojim. Sevkurs, kas gribēs redzēt dokumentalūs sižetus, tū varēs dareit sātys lopā www.orudi.lv, kas ir bīdreibu “Sukrums” i “Saulessvece” kūpprojekts.

Projekta ītvorūs plānuots veiduot ari rodūšuos darbneicys i Baļtinovā, i pi projekta sadarbeibys partneru bīdreibu “Saulessvece” Brīžucīmā i “Kūzuls” Saļņovā.

Bīdreiba “Sukrums” ir īsasaistejuse ari NVO programā “Atbalsts jauniešu brīvprātīgajam darbam”. Pasasokūt itai programai, jaunīši kotru mienesi pusgoda garumā sajem stipendeju 90 EUR apmārā. Jaunīši veic breivpruoteigū dorbu, īsasaistūt Baļtinovys Rūmys Katuoļu bazneicys lūgu restauracejis procesā i veidojūt Ontana i Annes Tematiskū parku.

Baļtinovys Rūmys Katuoļu bazneicys lūgu restauracejis dorbi tyka suokti ituo gods juņa suokumā, pasasokūt draudzis lūcekļu sazīduotajai naudai. Itūšaļt piļneibā atjaunuoti jau 4 nu 12 bazneicys lūgu, nu rekonstrukcejis dorbi suokti vēļ 3 lūgim. Dorbs prosa lelu viereibu i ryupeibu sevkurys lūga ryuts apstruodei. Kai atzeist bīdreibys puorstuovi i īsaisteitī breivpruoteigī jaunīši, dorbs, kas saisteits ar bazneicu, dūd lelu gandarejumu dvēselei.

Paraleli dorbim, kas saisteiti ar Baļtinovys Rūmys Katuoļu bazneicys lūgu restauraceju, breivpruoteigī jaunīši veic aktivitatis ari Baļtinovys nūvoda Vacajā parkā. Saisteibā ar itū projektu bīdreiba “Sukrums” sasadorboj ar bīdreibu “Jaunieši Baltinavai”, kura realizej sevis izlūluotu ideju par Ontana i Annes tematiskuo parka izveidi. Projekts ar nūsaukumu “Tev, man un visiem mums – lai top Baltinavā” suokts ituo gods julī, teikūt pi finansialuo atbolsta nu Borisa i Inārys Teterevu fonda. Kūpejuos projekta izmoksys sastuoda 7065,15 EUR, kur 89% sadz Borisa i Inārys Teterevu fonds, nu atlykušuo vierteiba teik atbaļsteita Baļtinovys nūvoda pošvaļdeibai. Par itim leidzeklim plānuots puorbyuvēt tyltu, izveiduot bruka celeņus, izgatavēt sūlus, informativuos nūruodis, leigačys i karteņu rāmi dobā, izveiduot “Ontana i Annes” varūņu siluetus i izbyuvēt lapeni. Itūšaļt dorbi suokti pi tylta puorbyuviešonys. Vacais tylts jau ir nūjaukts i teik veikti vysi dorbi, kab leidz mieneša beigu jaunais tylts byutu pabeigts.

Paraleli jau asūšajam finansiejumam, bīdreiba “Jaunieši Baltinavai” kūpā ar bīdreibys “Sukrums” breivpruoteigajim jaunīšim pošrūceigi gatavej suvenirus, kurus zīduojumu veidā varēs īsaguoduot “Ontana i Annes” izruožu laikā. Itī zīduojumi tiks nūvierzeiti Ontana i Annes Tematiskuo parka pylnveiduošonys dorbim, kas finansialūs īrūbežuojumu dieļ suokumā natyka īkļauti projekta izstruodis gaitā.

Bīdreibai “Jaunieši Baltinavai” itys ir pyrmais tik lela apjūma projekts, partū bīdreibys “Sukrums” prīšksādātuojs Aigars Keišs nasaskūpoj ar lītdereigim padūmim efektivuoka dorba realizacejis procesam.

Gods ir tik pusē, nu bīdreiba “Sukrums” vys vēļ kaļ jaunus nuokūtnis planus sovu ideju realiziešonā.