Septembrī piec vosorys puortraukuma atsagrīž Latgolys Kulturviesturis muzeja tradicionali reikuotuo “Vēstures mirkļu pietura”. Itūreiz tiks īpazeistynuots ar cylvāku, kurs pasauli īraudzeja 16. oktobrī pyrma 150 godu i kura vuords latgalīšim ir tik pazeistams i svareigs. Tys ir goreidznīks, politiks, rakstnīks, folklorists, cylvāks, kas palyka uzticeigs sovim idealim – Fraņcs Trasuns.

Rēzeknē jam ir veļteits pīmineklis skulpturu grupa “Vysa vaļsts” skverā pi J. Ivanova Rēzeknis Muzykys vydsškolys, kū atkluoja 2009. godā. Rēzekne 1917. godā beja muojvīta Latgolys kongresam, kur tyka nūlamts, ka Latgolai ir juoapsavīnoj ar puorejim Latvejis nūvodim, tūpūt par Latvejis Republiku, sovukuort ituos idejis aizstuovs beja Fr. Trasuns. Taipat ari juo atdusys vīta ir Rēzekne, Mīra īlys Bruoļu kopi. Fr. Trasuns vysu myužu ir veļtejs Latgolys kulturys i volūdys aizstuoveibai, gribiejs, kab zemnīki palīk tureiguoki, tauta izgleituotuoka, aicynuojs apsazynuot sova nūvoda vierteibu.

Ateimūt iz Latgolys Kulturviesturis muzeju 23. septembrī 14.00, “Vēstures mirkļu pieturā” izzynuosit par Fr. Trasuna daudzpuseigū i ražeigi pīpiļdeitū myužu, kai ari byus vareiba apsavērt 20. godu symta suokumā juo izdūtū Daugovys katuoļu kalenderi, vysaidys kartenis, publicātūs dorbus. Saprassit, parkū Fr. Trasuna bērēs Vaļsts prezidents Juoņs Čakste saceja tik popularū frāzi – “Fraņcs Trasuns īlyka myusu Latvejis gierbūnī trešū zvaigzni – Latgolu”.

Īīšona: pīaugušajim 1,50 EUR, školānim 0,80 EUR.