Catūrtū godu piec kuortys 18. novembrī rēzeknīši, nūvoda dzeivuotuoji i gosti teik aicynuoti pīsadaleit Latvejis dzimšonys dīnai veļteitajā Tautys skriejīnī “Īelpoj Rēzekni 2014!”.

Tautys skriejīņa “Īelpoj Rēzekni!” idejis autori ir Rēzeknis piļsātys Jaunīšu dūme i tys ir palics jau par tradiceju, kas kotru godu 18. novembrī puļcej kūpā vys vaira dalinīku – 2011. godā skriejīnī pīsadaleja 250 dalinīku, 2012. godā – vaira nakai 330, nu viņgod – jau 446 dalinīki.

Ari itūgod Latvejis Republikys proklamiešonys dīnai veļteitajā skriejīnī “Īelpoj Rēzekni!” teik aicynuoti pīsadaleit i individualī dalinīki, i komandys. Tautys skriejīņa starts 14.00 Festivala parkā (Piļs īlā 7), distance namaineiga – nu Festivala parka pa Atbreivuošonys aleju leidz Lubuonys īlys krystcelim i atpakaļ, distancis garums ir apmāram 3 km.

Individualī dalinīki i komandys (vīnā komandā vysmoz 5 dalinīki) ar laika kontroli aicynuoti dasasaceit skriejīņam leidz 11. novembram Rēzeknis Sporta puorvaļdē (18. novembra īlā 39, 2. stuovā, 3. kab. voi pa e-postu: sports@rezekne.lv), aizpyldūt dasacejuma anketu. Dalinīki bez vacuma īrūbežuojuma, kuri gryb pīsadaleit skriejīnī bez laika kontrolis, varēs registrētīs ari 18. novembrī nu 13.00 Rēzeknis kulturys nomā (Bruoļu Skryndu īlā 3). Komandys teik aicynuotys veiduot interesantu vizualū tālu i puorsteigt skateituojus i žūreju, atraktivuokuos komandys tiks apbolvuotys 6 nominacejuos! I individualī, i komandu 1. – 6. vītys uzvarāuoji ar laika kontroli kotrā vacuma grupā sajims kausus i diplomus, nu sevkurs dalinīks – pīminis veļti par pīsadaleišonu skriejīnī.

Festivala parkā pyrms i piec skriejīņa dalinīki varēs sasasiļdeit, baudūt syltu čaju i īsavyngrynojūt disko muzykys ritmūs kūpā ar Dj Juri Vucānu, muziki Ingaru Punculi, deju studeju “Stop Time” i cytim vītejim muokslinīkim.

Skriejīņa “Īelpoj Rēzekni!” idejis autori ir Rēzeknis piļsātys Jaunīšu dūme, tū organizej Rēzeknis piļsātys dūmis Sporta puorvaļde sadarbeibā ar Jaunīšu dūmi, Austrumlatvejis rodūšūs pakolpuojumu centru “Zeimuļs” i pošvaļdeibys agenturu “Rēzeknis Kulturys i Turisma centrs”.