18. februarī 15 stuņdēs Daugpilī nūtyks Latvejis Basketbola leigys (LBL) Zvaigžņu spēle. Daugpiļs ir deveituo piļsāta Latvejā i pyrmuo Latgolā, kur 20 godu pastuoveišonys laikā nūtiks spēle.

Zvaigžņu spēlē kasgods pīsadola lobuokī LBL basketbolisti. Itymā godā sovā storpā sasacenss LBL komanda i Legionaru izlase.

Zvaigžņu spēlis laikā nūtiks ari tradicionalī treispunktu metīņu saceņseibys, slam dunk konkurss, meistareibys konkurss, treneru saceņseibys, komandu karsiejmārgu konkurss. Taipat byus konkursi skateituojim i vītejūs muokslenīku, kuru vydā byus ari latgalīšu grupa „Dabasu Durovys”, uzastuošona.

Kai uzsvar LBL puorstuovi, ar itū spēli tiks raudzeits stiprinot sporta veida pozicejis Latvejis ūtrā leluokā piļsātā ar cereibom, ka Daugpiļs Universitatis komandai, kas veiksmeigi pīsadola Latvejis Sīvīšu basketbola leigys čempionatā, ar laiku pīsavīnuos ari spieceiga veirīšu komanda, nu Daugpiļs Sporta puorvaļdis vadeituojs prīcojās, ka spēlis nūtikšona Daugpilī ir lela nūtikšona na viņ piļsātai, nu sporta veida populariziešonai i atteisteibai vysā Latgolys regionā.

Īejis moksa iz spēli: pīaugušim 1,00 Ls, bārnim nu 7-18 godim 0,5 Ls, jaunuokim par 7 godim i pensionarim īeja bez moksys.

Reportaža nu spēlis byus apsaverama 19. februarī 14 stuņdēs LTV7 kanalā.