29. februarī Daugovpiļs teatrī byus pyrmizruode jaunai izruodei latgaliski – „Rūžys byudu golūs”.

„Rūžys byudu golūs” ir Monikys Zeilis speciali aktrisei Maijai Kuorklišai latgaliski saraksteita izruode. Lugā ir īkļautys realu dzeivisstuostu detalis, tuos golvonū varūni sauc Monika, kas ir kai veļtejums autoris dzymtai, kurā itys vuords beja populars.

Jaunuo izruode ir 2010./2011. godu teatra sezonys lobuokuo režisora Pītera Krilova (Pēteris Krilovs) radūšuo atsagrīzšona Daugovpiļs teatrī piec 17 godu puortraukuma. Lugys īstudiešona kai ūtrei režisore struodoj Anita Spruoge (Anita Sproģe). Pīters Krilovs nūruodeja, ka itys ir cīši rešs nu eipašs gadiejums, seviški Latvejā, kod autors saroksta dorbu konkretam akteram, pībiļstūt, ka Monikys Zeilis saraksteituo luga ir cīši kvalitativa i dorbam pateiceiga, jo nasaverūt iz individualitati, lugys varūnē gondreiž kotra skateituoja varēs atpazeit sevi.

Maija Kuorkliša atzeists, ka struodojūt pi ituo īstudiejuma, jei tū veļtej sovam aizsaulē aiguojušam Papam, kurs byutu cīši lepuojīs, ka meita nu skatuvis runoj juo dzymtajā volūdā.

„Rūžys byudu golūs” byus ūtrais īstudiejums latgaliski Daugovpiļs teatrī, īzeimojūt svareigu repertuara politikus vierzīni – regulari pīduovuot Latgolys i vysys Latvejis skateituojim izruodis latgaliski. Pyrmais Daugovpiļs teatra īstudiejums latgaliski ir Kristīnis Jokstis komedeja „Klepernīku pogosta zvaigzne”, kas vēļ arviņ ir teatra repertuarā gon Daugovpilī, gon izbraukumu izruodēs.

„Rūžys byudu golūs” ir aktrisis Maijis Kuorklišys monoizruode latgaliski. Izruodis režisori – Pīters Krilovs i Anita Spruoge. Scenografs – Uģis Bierzeņš. Kostimu muokslineica – Kristīne Abika. Tautysdzīšmu apdaris taisiejs Arturs Uškāns.

Iz pyrmizruodi 29. februarī bileti vaira nav dabojami, nu tyvuokuos izruodis paradzātys 1. martā 18:30, 4. martā 17:00, 24. martā 13:00, 7. i 22. aprelī 17:00 kai ari izbraukumā Dailis teatrī Reigā 8. aprelī 15:00 i 19:00.

Bileti nūpārkami Daugovpiļs teatra kasē (t. 65426520), „Biļešu paradīzes” kasēs vysā Latvejā i škārsteiklā www.bilesuparadize.lv .

Kartenis – Daugovpiļs teatra publicitatis materiali:

1. Aktris Maija Kuorkliša

2. Režisors Pīters Krilovs

3. Režisore Anita Spruoge

4. Tautysdzīšmu apdaru taiseituojs Arturs Uškāns