Trešdiņ, 25. februarī 18.00, Reigā, kinoteatrī Splendid Palace nūtiks dokumentaluos kinys “Ceļa gols” pyrmizruode.

Kina stuosta par sīvīti, vuordā Daina, kura dzeivoj Latvejis austrumdaļā Latgolā, tyvu Krīvejis rūbežam. Jei dzeivoj treis kilometru attuolumā nu tyvuokuo ceļa, bez elektreibys i krana iudiņa. Jumts ir ībrucs. Jei ir piļneibā atkareiga nu tuo, kai poša tiks golā ar kasdīnys dzeivi. Obeji Dainys bārni ir emigrējuši – dāls aizbraucs iz Norvēgeju, meita – iz Italeju. Kod jei jiutās vīntuļa, jei īt iz kopim i sēd pi sova myrušuo veira kopa, sasarunojūt ar jū it kai jis vēļ byutu dzeivs. “Ceļa gols” ir i poetiska, i eksistenciala kina par izvielem, kurys mes izdorom sovys dzeivis laikā, par styurgaļveibu, mīlesteibu i nūdeveibu.

Kinys režisorei zvīdrītei Modai Nīkanderei (Maud Nycander) ir lela pīredze dokumentalūs kinu veiduošonā. Juos kina “Kļaštorneica” (“Mūķene”) (2007. g.) dabuoja Prix Italia bolvu i “Zalta vabali”. “Slāgtuo nūdaļa” (2010. g.) – divdaleiga kina par slāgtū psihiatriskū nūdaļu tyka nomināta nacionalajai bolvai TV-kristallen i Lelajai žurnalistu bolvai. Juos jaunuokuo kina “Palme” (2012. g.) puļcēje 240 000 kinoskateituoju Zvīdrejā, sajēme divejis “Zalta vabalis” i izraiseja napīradzāti lelys socialuos debatis Zvīdrejā.

Kina veiduota sadarbeibā ar Zvīdrejis televizeju (SVT) i Zvīdrejis Kinu instituta (Svenska Filminstitutet), EU Media, Muokslinīku padūmis, Helge Ax:son Johnson Stiftelsen i Kulturkontakt Nord atbolstu.