Viņgod taišni aprelī Latvejā beja leluokais meža guņsgrāku skaits. Itūgod, pasasokūt laika apstuoklim, guņsgrāku ir mozuok, tok Vaļsts meža dīnasts apreļa suokuos ziņuoja, ka meži itūgod daguši jau 102 reizis. Meža dīnasta puorstuovs Edijs Leišavnīks nūruoda, ka guņsnadrūšais periods varātu tikt izsludynuots maja suokuos. Pyrma tys suocīs, raidejumā Kolnasāta saruna par to, kai dzēst guņsgrākus, ka nav naudys, kū moksuot guņsdziesiejim. Mežu dziesšonys funkceja uztycāta Vaļsts meža dīnastam, tok īstuodei nateik pīškierts papyldu finansiejums, kab īsaguoduotu tehniku i inventaru, kai ari – nūdrūšynuotu dežurys vysūs guņsnūvāruošonys tūrņūs. Vaira par situaceju Dacis Dambis reportažā nu Janapolis guņsnūvāruošonys tūrņa Rēzeknis nūvodā, tys ir vīns nu tūrņu, kas itamā sezonā byus tukšs.

Meža dīnasts ir Zemkūpeibys ministra padūteibā, ministrejā iz napītīkamuo finansiejuma problemu verās bez satraukuma, nūruoda, ka informativū ziņuojumu, kurymā praseits papyldu finansiejums mežu guņsgrāku dziesšonai, niu papyldynoj i konsultejās ar Finanšu ministreju. Voi rezultats byus, par tū ziņu vys nav.

Meži na tik dag, tūs ari zūg, Vaļsts meža dīnasts apriekinuojs, ka viņgod mežim nūdareiti gondreiž 2 miļjonu eiro zaudiejumi. Latgolā konstatāti 180 patvaleigys ciersšonys gadejumi. Par zaglim, gruobalim i plagiatismu vuordineicā runoj Valentins Lukaševičs i Arņs Slobožanins.

Nu raidejuma pyrmajā daļā Renāte Lazdeņa īrokstā vad Kolnasātu iz Ludzu, kū pamatuoti sauc par handbola aba rūkysbumbys lelpiļsātu. Latvejis vacuokajā piļsātā handbola tradicejis teik kūptys jau catūrtū godu dasmytu. Lela nūzeime ir pošvaļdeibys atbolstam i sakuortuotai sporta infrastrukturai – Ludzā ir sporta halle, trenažīru zals, maneža. Spālātuoji, kuri vuicuos i struodoj Reigā i cytur Latvejā, brauc iz Ludzu handbola treneņu dieļ. Te vys atsakluoj medaļa ūtruo puse – izbraukuot nu Reigys iz Ludzu ir duorgi i laikītiļpeigi, lobi jaunī spālātuoji pabeidz 12. klasi, aizbrauc i naatsagrīž. Renāte Lazdeņa devēs ari iz Rūbežnīkim, kur izveiduota alpinisma sīna i škieršļu jūsla, kai ari Rēzekni, kur, nasaverūt iz nalobajim treneņu apstuoklim, vīglatletu treneri sprīž, ka iz Riodežaneiro Olimpiskajom spēlem 2016. goda vosorā varātu braukt treis jūs sportisti.

Raidejumu klausīs ite.