12. majā 14.00 Latgolys Kulturviesturis muzejā (Atbreivuošonys alejā 102, Rēzeknē) nūtiks Viesturis šaļteņu pītura “Viesturiskais 1990. goda 4. majs”.

Itūgod paguojuši 25 godi nu 1990. goda 4. maja, kod pījēme deklaraceju “Par Latvijas Republikas neatkarības atjaunošanu”, kai ari atjaunuoja Satversmis sapuļcis 1922. goda 15. februarī pījimtū Latvejis Republikys Satversmi. Godadīna Rēzeknē ir atzeimuota vairuoku dīnu garumā (Latvejis Radejis tīšraidis, Draudzeibys velobraucīņs i cytys nūtikšonys), nu ir vārts vēļreiz īsaklauseit tuo laika nūtikšonuos, kas Latvejis viesturē ir vīnys nu svareiguokajom.

Partū itūreiz Viesturis šaļteņu pītura veļteita Trešuos Atmūdys nūtikšonom piļsātā i vaļstī, partū ka Rēzekne Atmūdys laikā beja vysys Latgolys nūtikšonu centrs, kod sabīdreiba aktivi i emocionali īsasaisteja vysaiduos kusteibuos (LTF, Helsinki – 86, LNNK i cytuos) i pīsadaleja pasuokumūs. Eipašys emocejis beja taišni 4. majā – siežūt pi sovu radeju tyka skaiteits kotrs bolss “Par”.

Kab dziļuok izprostu 4. maja nūzeimi Viesturis šaļteņu pīturā muzejā pīsadaleis Gunārs Klindžāns, kurs 1990. goda 4. majā beja Latvejis PSR Augstuokuos Padūmis deputats i bolsuoja par Latvejis naatkareibys atjaunuošonys deklaraceju, kai ari Atmūdys laika Rēzeknis piļsātys vadeituoji – Aleksejs Avots i Juoņs Karro, kuri davuši nūzeimeigu īguļdejumu piļsātys atteisteibā.

Īīšonys moksa Viesturis šaļteņu pīturā: pīaugušajim 1,50 EUR, školānim 0,80 EUR.

Karteņa: 1990. goda 25. majs – Vālātuoju Piketa akceja Piļsātys padūmis uorkuortys sesejis laikā pi Rēzeknis izpyldkomitejis. Tyka lamti vaicuojumi par politiskū i ekonomiskū situaceju Rēzeknē sakarā ar LPSR AP Deklaracejis “Par Latvijas Republikas neatkarības atjaunošanu” pījimšonu. Kartenis autors: Aleksandrs Bondarenko.