Skaiteituoju bolsuošona par 2011. goda skaistuokū gruomotu
LaKuGa jau ziņuoja, ka Latgolys Studentu centra izdūtuo gruomota “Es soku, tu soki. Puosokys par krīzi“ ir nomineita gruomotu muokslys konkursā “Zelta ābele 2011” i atzeita kai vīna nu skaistuokūs 2011. goda Latvejis gruomotu. Niu portalā „Delfi”nūteik portala skaiteituoju bolsuojums par sovu simpateju. Ka ir iņteress i patikšona, dreikst atbaļsteit ari latgalīšu izdavumu.
Tradicionalais skaiteituoju bolsuojums portalā “Delfi” nūtiks nu 5. marta leidz 9. apreļam. Apsaver ituos gruomotys i viertej pats!
Vyss konkursam nomineituos gruomotu saroksts apsaverams ite, bet gruomota „Es soku, tu soki. Puosokys par krīzi” piec žurejis viertejuma ir vīna nu pīcu skaistuokūs prozys sadaļā.
Konkursu “Zelta ābele 2011” reikoj Latvejis Gruomotizdevieju asociaceja. Deveņpadsmit godu laikā gruomotu muokslys konkurss „Gada balva grāmatniecībā” (da tuo “Skaistākā grāmata”) ir izaudzs par lelu pasuokumu, kas ceļ nūzaris prestižu, veicynoj izdevieju profesionalū izaugsmi i pīsaista plašys sabīdreibys viereibu gruomotom. Pa itim godim konkursā pīsaceita 1581 gruomota.
Itymā godā konkursā “Zelta ābele” 34 izdevieji beja pīsacejuši 95 gruomotys i kalenderus (saleidzynuojumam – pārņ 29 izdevieji ar 85 izdavumim). Gruomotys viertēja žurejis komiseja itaidā sastuovā: Austra Avotiņa, Ieva Bečere, Ingrīda Burāne, Aleksandrs Busse, Aleksejs Naumovs, Kārina Pētersone, Uldis Sosnovskis, Ojārs Spārītis, Ruta Svaža.
Nomineituos gruomotys varēs apsavērt vairuokuos izstuodēs Reigā:
– Reigys Centralajā bibliotekā, 5. – 31. marts (piec tam gruomotys tiks eksponātys vysaiduos RCB filialēs da goda beigu)
– Gruomotu sātā “Valters un Rapa”, 12. marts – 11. apreļs
– Latvejis Nacionaluos bibliotekys Elizabetis īlys lūgūs, 3. – 30. apreļs.
Gruomotys tiks eksponātys ari Frankfurtis i Leipcigys gruomotu godatiergūs vuocu gruomotu muokslys fonda organizātajā ekspozicejā.
Konkursa nūslāguma ceremoneja byus 11. aprelī 17:00 stuņdēs.
Konkursu atbolsta Kulturys ministreja, VAS “Latvijas dzelzceļš”, Vaļsts kulturkapitala fonds, Jelgovys tipografeja, Arctic Paper Baltic States, SIA “Anatalis”, Iļģucīma maizneica konditoreja. Informej “Delfi”, “Diena”, radeja “NABA”.
