26. februarī Viļānu kulturys nomā dasmitū reizi iz ziņgeituoju i stuostnīku konkursu – koncertu sasatyka 10 stuostnīki i 18 kolektivi nu vysaidom vītom Latvejā – nu Jelgavys, Borkovys, Modyunis nūvoda, Lubuonys, Ondrupinis, Aglyunys, Daugpiļs, Ludzys nūvoda, Viļānu nūvoda i ari nu sābru pusis Lītovys – Utenys.

Ziņgeituoju stuostnīku sasatikšona izavierte 5 stuņžu maratonā – sovu variešonu kotrs dalinīks ruodeja pa 2-3 gobolim, nu piec koncerta dalis turpynuojās daņči gon Viļānu kapelys „Bumburneicys” vadeibā, gon cytom grupom.

Par gūdu jubilejis reizei Tautys muzykantu bīdreiba izdeve eipašu kladi ar lobuokom i meiluokom pasuocīņa dalinīku ziņgem i stuostim. Kladi byus vareiba pasyuteit i nūpierkt Tautys muzykantu bīdreibys sātyslopā www.muzykanti.lv.

Konkursa dalinīkus viertieja div kategorejuos – stuostnīki i ziņgeituoji. Viertiešonā pīsadaleja gon skateituoji, gon poši dalinīki i pasuocīņa organizatori. Skateituoju simpateju bolvu kai lobuokuo stuostneica sajieme Aija Zemīte nu Lubuonys nūvoda. Dalinīki par lobuokim atzyna Pīteri Stafecki nu Viļānu nūvoda, Trifinu Ovčinikovu nu Audrenim i Juoni Sileņu nu Varakļuonim. Ziņgeituoju kategorejā skateituojim i pošim dalinīkim vysvaira patyka Dekšāris pogosta veiru ansamblis „Kūzuls”. Atzineibu izapeļnieja ar kapela „Sābri” i Utenys dzīduotuoji.

Informaceja nu Viļānu nūvoda i Tautys muzykantu bīdreibys sātyslopys

Video – Ziņgeituoju i stuostnīku vokors Viļānūs

Kartenis – foto Guntis Pakalns (eipašs paļdis Ingunai Žogotai!)