Kab mudynuotu meklēt, īsavērt i varbyut ari atkluot sovu Raini ci Raini sevī Raiņa muzejs „Jasmuiža” izsludynuojs rodūšūs dorbu konkursu vydsškolānim „Par kū maņ naizīt dzeja nu munu sirdssuopu?” (Par ko man neiznāk dzeja iz manām sirdssāpēm?)

Konkursu organizej Raiņa muzejs „Jasmuiža” Preiļu nūvodā ar mierki aktualizēt Raiņa daiļradis, ideju i personeibys lūmu myusdīnu sabīdreibā, rūsynuot jaunīšu iņteresi par latvīšu literaturu i veiduot izpratni par kulturviesturis i identitatis vaicuojumim, veicynuot jaunīšu patstuoveigu dorbu, sovys attīksmis i sprīdumu veiduošonu i spieju īraudzeit pasauļa kūpsakareibys i problemys.

Konkursā pīsadola vyspuorizgleitojūšūs školu školāni, videju specialūs vuiceibu īstuožu audziekni, studenti i c. jaunīši vacumā nu 15 leidz 19 godu.

Konkursa dalinīkim juoīsnādz rodūšais dorbs par temu „Par kū maņ naizīt dzeja nu munu sirdssuopu?”. Tys var byut pietejums par Raiņa daiļradis, biografejis, dīnysgruomotu aspektim, dūmroksts, literars dorbs (eisais stuosts, eseja, viestule, luga ci dramatisks fragments, dzeja i tt.). Dorbā juoatkluoj autora personiskuo attīksme pret dzejnīku, juo daiļradi, juo ideju pasauļu saisteibā ar šudiņdīnys dzeivis i muokslys procesim. Kai temys, tai formata izviele ir breiva.

Dorbs juoīsnādz datorsalykumā izmārā leidz 10 000 zeimu.

Dorbi juoīsnādz leidz 2012. gods 24. apreļam elektroniski, syutūt muzejam iz e-postu jasmuiza@memorialiemuzeji.lv

Konkursa dorbu viertiešonā pīsadaleis dzejnīki, dramaturgi i Raiņa i Aspazejis muzeja specialisti. Uzvarātuoji bolvuos sajims duovonu karti nu Zvaigzne ABC i Latgolys keramiķu Viktora Ušpeļa i Edvīna Vinceviča taiseitus keramikus prīkšmatus.

Vaira dazynuošonai par konkursu.

Jasmuiža teik saukta par Raiņa jaunūs dīnu zemi – tei jam saistejuos ar jauneibys romantiku, īsamīļuošonu, rodūšu īdvasmu, ari skumeigom puordūmom, sevs i sova ceļa mekliešonu. Jasmuiža Raiņam beja tāva sāta 8 godu garumā. Tei beja vīra, kur jis vysod beja gaideits, ite jis varieja atbraukt, atsapyust, juot ar zyrgu ci natraucāti dzejuot. Vysi gimnazista, piečuok studenta Juoņa īspaidi, zynuošonys, pīradzātais plyuda ari iz Jasmuižu, puornasti ar viestulem, mutvuordūs. Jasmuiža Raiņam tūlaik beja sova veida zibšņasorgs, kur var meklēt paspuorni, lyugt i sajimt atspaidu…

Pošu šaļti Jasmuiža ir vīta, kur var uzklauseit stuostu par jaunīša Juoņa Plīkšāna dūmom, dorbim i atkluosmem, īsaviert puorīsmē, īpazeit dzejnīka dzeivis telpu, īgiut prīškstotu par Plīkšānu saimis dzeivi i tod varbyut saleidzynuot ar sevi, sovom dūmom, gribiešonu, puordūmom…

Informacejis olūts: Raiņa muzejs „Jasmuiža”.

Karteņa: muzeja publicitatis materiali