Latgalīšu kulturys Goda bolvā “Boņuks 2011” bolvu par spylgtuokū debeju latgalīšu literaturā 2011. godā sajieme jaunuo ailineica Anita Mileika nu Osyunys. Ite LaKuGys skaiteituoju viereibai jaunuokais nu Anitys. Vaira par autori var puorskaiteit ITE.

#^#

pyrmī putni atsagrīze ni simboliski a eistyni tova

dzimde puorplyust atteiceigai nu tuos kaids izkuop uorā klīgdams

valns sazyn kū par myusu myuža ļūbesteibu tovi

godi i tovi bārni vīnaiži beistami

a kū tu poša par tū vysu dūmoj? nazynu. i asu apmīrynuots, ka nazynu.

 

#^#

agri nu reita

muote žarej škvarkys.

irā bolta solta stolta zīma. devendesmitī godi.

es vēļ pavysam moza

no jau strogai zynu, ka muote maņ irā nastajaščuo ukrainka.

 

paiežam.

es skrīnu iz školu.

a muote skrīn iz autobusu. brauks da Dagdai.

 

kod atīmu nu školys

muote jau sātā.

 

piļsātā sataisiejuse šikarnū zavivku.

 

#^#

meilīs!

 

tova morda maņ ļūti duorga.

 

#^#

itymā godā muns veirīts bēgs nu cītuma

paļdis Dīvam ar butylku puorgrīzts vādars sadzejs

 

i tāņ jis kurevuos munys cigaretkys i īss munā vanā

es dīndīnā dūmuošu kū pagotaveit vakareņom

 

a vyss byutu prostuok

kod es juo tik styprai naļūbeitu

tod muna sirksneņa byutu breiva

i peizda – poligama

 

#^#

nazkod naktī

vysi cīma ļauds

aizbrauca ar zyrgim prūm. vot i vysa meikle. vot i žņaudz kai čiuska.

 

naktī sīvīte izkuop nu gultys –

čuruot, peipuot i baruot malnū kači

veirīts korsts kai samovars palīk ūtra stuova ustobā gultā pi sīnys.

 

a jei vysu nakti var bludavuot pa sātys pyrmū stuovu i dūmuot,

ka jis tī ūtrajā stuovā nikuo nazyna.

 

īmeslis, kas prodzina vysu cīmu prūm

beja juos nalobuo acs.