Voi ir kaids taids albums, kurymā vīnā gobolā vydā byutu vysyspopularuokuos latgalīšu dzīsmis? Da ituo iz vaicuojumu varieja pagrūzeit golvu i saceit, ka dreižuok navā gon. Ituo goda juļa mieness situaceju ir mainejs – izguojs kapelys “Maskačkas spēlmaņi” (“Maskačkys spieļmani”) dubultalbums “Apleik kolnu”.

Albuma “Apleik kolnu” divejūs diskūs kūpā vydā atrassit 26 popularys i iz vysa popularuokuos latgalīšu dzīsmis – nu “Auga, auga rūžeņa” i “Tuoli dzeivoj” da “Nadūd, Dīvs, veitulam”. Gondreiž 140 minutu popularūs dzīšmu, kas īraksteitys ar maksimali dabeigu pajiemīņu – vīnlaiceigi īrokstūt vysus instrumentus i bolsus. Kai atzeist poša kapela – seņuok, stateidami īrokstu programys, “Maskačkas spēlmaņi” raudzeja atrast kuo na viņ iņteresnuoka, nazynomuoka, nu balūs, večerinkuos i jubilejūs vysod taipat spālātys popularuos dzīsmis. Kod ļauds vaicuoja, kur i voi var atrast ituos popularuos dzīsmis, kapela saprotuse, ka ir iņterese ari par taišni taida veida īrokstim. Dubultalbums nu suoku nabeja planavuots, nu “Maskačkas spēlmaņi” raudzeja dzīsmem īraksteit vysus zynomūs pantus, deļtuo dzīsmis naīsakļuove īrostajūs laika standartūs. Dzīsmis daudzūs panteņu garumā ir na viņ nūklausomys, nu ari vysi dzīšmu vuordi ir puorskaitami simboliskajā diska gruomateņā.

Albums īraksteits gondreiž treis godu garumā nu 2011. goda decembra da 2014. goda augusta, skona operators Pauļs Paulins. Vizuali izdavumu dyžan pīviļceigu padora karikaturista Gata Šliukys zeimiejumi.

Kapela “Maskačkas spēlmaņi” dorbojās nu 1995. goda septembra i par sovu lauceņu izavieliejuse ļusteigu spieliešonu 19. godsymta beigu – 20. godsymta suoka stilā, raugūt spēlēt tai, kai lauku muzykanti spielieja pyrma symta godu.

“Apleik kolnu” izdūšonu atbaļstejs Vaļsts kulturkapitala fonds.