Turpynojūt Raiņa jubileja goda nūtikšonys, Raiņa dzimšonys dīnā 11. septembrī, kod Latvejā svietej Dzejis dīnys, Daugovpiļs nūvodā Raiņa sātā Berkenelē nūtiks pasuokumu cykla  “Vai atmini mani? Rainis” ūtruo aina ar nūsaukumu “..manas bērnības atmiņas saule”.

Jau 10. septembrī 11.00 nūtiks godskuortiejais skotuvis runys konkurss “Zelta sietiņš”, kurymā pīsadola Latgolys školu 2. – 12. klašu školāni. Sovukuort 11. septembrī 18.00 Berkenelē izskanēs muzykals breivdobys izvadums “…atmiņās iegāju te…”, kur Daugovpiļs nūvoda amatermuokslys kolektivi īsajuss dzejnīka dūmuos i sajiutuos, atguodojūt Raiņa bārnu dīnu zemi Berkeneli, informej Raiņa sātys direktore Inese Bierzeņa.

Atmiņu izvadums suoksīs ar tierga ainom, kaidys varēja nūtikt Dinaburgā 19. gs. beiguos, darbeiba turpynuosīs pi Berkenelis sātys, kur tiks ruodeitys ainenis nu mozuo Žaneņa dzeivis. “Izvaduma laikā vysi kūpā tiksim laikūs, kad lelais Rainis vēļ beja mozais Žaneņs i iz vysu vērēs pyrmū reizi, laikūs, kod vyss radzātais, pīdzeivuotais i izjustais nuokamajam dzejnīkam varēja kolpuot par īdvasmu rodūšajai fantazejai i dzejai,” uzsver pasuokuma režisors Ivars Brakovskis.

Izvaduma scenareju veidoj Alda Krasteņa. Pasuokumā kūpā ar Daugovpiļs nūvoda teatra studeju “Berķeneles Kamolītis” pīsadaleis folklorys kūpa “Dyrbyni”, vokaluo studeja “Stage On”, Kulturys centra jauktais kors “Latgale”, Leiksnys pogosta kulturys noma amaterteatris “Maskas”, Leiksnys pogosta kulturys noma vidiejuos paaudzis deju kolektivs “Daugaveņa”, Daugovpiļs Latvīšu kulturys centra vidiejuos paaudzis deju kolektivs “Saime”, postfolklorys grupa “Rikši”, Dramaturgu teatra trupa i guņsšova grupa “Ello&Co”.

Pasuokumu atbolsta Daugovpiļs nūvoda Kulturys puorvaļde, Vaļsts Kulturkapitala fonda mierkprograma “Raiņa un Aspazijas gads”, Latvejis vaļsts mežu atbaļsteituo “Latgales kultūras programma 2015”.