Itūgod Jaunīšu Etno dīnys aizritēs Raiņa zeimē
Nu 18. da 20. septembra Raiņa muzejā “Jasmuiža” nūtiks kasgadiejais pasuokums Jaunīšu Etno dīnys jaunim cylvākim, kas interesejās par tradicionalū kulturu i etno muzyku. Raiņa jubileja godā Jaunīšu Etno dīnu dalinīki studēs Raini – apdzeivuos i pīskandynuos Raiņa muzeju, pīsadolūt izvaduma “Latgalīšu kuozys” veiduošonā.
Itūgod Jaunīšu Etno dīnu dalinīku vydā ir taidys folklorys kūpys kai Īcovys “Tarkšķi”, Leivuona “Ceiruleits”, Preiļu “Rūtoj”, Rēzeknis “Dziga” i “Vīteri”, Reigys “Ceidari” i “Kokle”, kai ari Rūpažu “Oglīte”.
20. septembrī 14.00 izvadums “Latgalīšu kuozys” tiks izruodeits Raiņa muzeja “Jasmuiža” pogolmā. Piec izvaduma sekuos Jaunīšu Etno dīnu dalinīku koncerts.
1884. goda augustā Rainis īsastuoja Pīterburgys universitatis Juridiskajā fakultatē, kur juo interešu lūkā beja ari filologeja i viesture. Ar Pīterburgu saisteiti daudzi svareigi Krīvejis rītumu nūmaļu etniskuos kulturys izpietis pasuokumi, kū organizēja Krīvu Geografejis bīdreibys Etnografejis nūdaļa. Tuos rūsynuots, folklorys i etnografejis materialu vuokšonai Latgolā vairuokys ekspedicejis (1882., 1884. i 1885. godā) veice Pīterburgys universitatis privatdocents Eduards Volters. Raiņa interesi par folkloru rūsynuoja taišni Eduarda Voltera pietejumi i lekcejis, juo mudynuots Rainis sovā dzimtinē nu Daugovpiļs nūvoda Vyšku pogosta teicieju pīraksteja kuozu dzīsmis i īražys. Raiņa roksts “Dinaburgas apriņķa Višķu pagasta kāzu ieražas” publicāts 1890. godā Eduarda Voltera gruomotā “Vitebskys apgobola latvīšu etnografiskī materiali. 1.daļa” (Pīterburgā, krīvu volūdā).
Jaunīšu Etno dīnys Latvejis Nacionalais kulturys centrs aizsuoce 2010. godā. Nūmetnē tradicionaluo kultura teik aktualizāta taišni jaunīšu auditorejā i runoj par tū jim saprūtamā volūdā – nūdarbeibuos i koncertūs, spēlēs i daņčūs. Pasnīdzieju vydā ir bejuši Laima Jansone, Zane Šmite, Ilga Leimane, Tāļs Gžibovskis, Ilmārs Dreļs i daudzys cytys Latvejā zynomys personeibys.
Jaunīšu Etno dīnys 2015 reikoj Latvejis Nacionalais kulturys centrs sadarbeibā ar Raiņa muzeju “Jasmuiža”.
Atbolsta Vaļsts Kulturkapitala fonds.
